ҰЖЫМЫ ҰЛЫҚТАҒАН ҰСТАЗ
«Ұстаз болу – өз уақытыңды аямау, өзгенің бақытын аялау», - деп Мұхтар Әуезов айтқандай, уақытпен санаспай балалардың болашағы үшін аянбай еңбек етіп жүрген мұғалім - Тілеубергенова Лаззат Жолдасқызы. Лаззат Жолдасқызы. Ол Маңғыстау облысы, Мұнайлы ауданының №8 жалпы білім беру мектебінің математика пәні мұғалімі. Жұмысына жауапкершілікпен қарайтын және өз пәнін жетік меңгерген, еңбексүйгіш, әрдайым ізденіс үстінде жүретін тұлға. Әріптестерінің құрметіне, оқушылардың алдында үлкен беделге ие және мектептің білім сапасын арттыруға зор үлесін қосуда.
Лаззат Жолдасқызы сабырлы, парасатты, жастарға ақылшы, педагог-зерттеуші ұстаз. Ол әрдайым оқушы қабілетін дамыту, ғылыми ізденісін ұштастыруға аянбай еңбек етеді. Ұстаздық еңбек жолында көптеген жетістіктерге жетіп, өзі және оқушылары аудандық, облыстық, республикалық сайыстардан жүлделі орындарды бағындырып келеді. Қазіргі заман талабына сай дамыта оқытудың жаңа технологияларын пайдалана отырып, оқушылардың сабаққа деген қызығушылығын арттырып, өз бетінше білім алуға, құштарлығын оятып, шығармашылықпен ізденуге ұмтылдырады.
Лаззат Жолдасқызы 2015 жылы «Математикалық регата» облыстық байқауында «Пирамида» тобының құрамында болып ІІІ орын, Математика пәнінен 10 сыныпқа «Функциялар графиктерін қарапайым түрлендіру» тақырыбында облыстық ашық сабақ өткізіп, Маңғыстау облысы білім басқармасының «Алғыс хаты», Математика пәні мұғалімдерінің «Математикалық регата» облыстық байқауында II орынмен марапатталды.
Мұнайлы ауданы әкімінің «Алғыс хаты», Қазақстан Республикасы Білім және Ғылым Министрлігінің «Құрмет грамотасы», «Daryn online» ұсынған I республикалық «Кемеңгер ұстаз» олимпиадасының I дәрежелі дипломы иегері. Математика,физика және информатика олимпиадалық резервінің мұғалімдері мен жаттықтырушыларының IMPACT Olympiad III Халықаралық шығармашылық конкурсы жеңімпазының мақтау қағазын алып, облыстық білім басқармасының «Құрмет Грамотасына», Білім педагогикалық шығармашылық орталығы ұйымдастырған «Шығармашыл педагог- 2022» байқауының I дәрежелі дипломына ие болды. Қазақстан математика пәні мұғалімдері қауымдастығының I қашықтық шығармашылық байқауында II дәрежелі дипломын жеңіп алды.
Білім саласында биік белестерді бағындырып, зерделі ұрпақ тәрбиелеуге елеулі үлес қосып жүрген осындай мұғалімдер жоғары құрметке лайық деп білеміз.
Мұнайлы аудандық кәсіподақ ұйымы, Маңғыстау облысы.
