АДАМ ӨМІРІ МЕН БОСТАНДЫҒЫ – ЕҢ ҚЫМБАТ ҚАЗЫНА
Әйелдер мен қыздарға қатысты гендерлік зорлық-зомбылыққа қарсы 16 күндік іс әрекет жыл сайын 25 қараша - Әйелдерге қатысты зорлық-зомбылықты жою күнінен бастап, 10 желтоқсан - Халықаралық адам құқықтары күніне дейін өткізілетін науқан болып табылады. Науқанның негізгі мақсаты – қоғамдағы әйелдер мен қыздарға қатысты зорлық-зомбылықтың алдын алу және сол зорлық-зомбылықты түбімен жою.
16 күннің ішінде қоғам белсенділері, жергілікті қауымдастықтар және ұйымдар гендерлік зорлық-зомбылық мәселесіне назар аударып, гендерлік теңдікті қолдау арқылы көптеген мәселелерге қозғау салып, қалың ел тарапынан қолдау тауып отыр.
«Қазақстандық салалық білім және ғылым қызметкерлері кәсіптік одағының Ақтөбе облыстық ұйымы» қоғамдық бірлестігінің заңгерлерінің қатысуымен білім беру ұйымдарында қоғамдық бақылаумен қатар еңбек қауіпсіздігі және еңбекті қорғау, еңбек заңнамасын түсіндіру, жеке еңбек дауларын қарау бойынша келісім комиссиясы мүшелерімен семинар мен дөңгелек үстелдер өткізіліп, әдістемелік кеңестер берді. Сондай-ақ, еңбек заңнамасының қолдану ерекшеліктері мен оқытушылар мүддесін қорғау, еңбек қауіпсіздігін қамтамасыз ету мәселелері аясында кездесулер өткізілді.
Атаулы күндер аясында Ақтөбе облысының аудандық білім қызметкерлерінің кәсіподақ ұйымдарының қолдауымен түрлі іс-шаралар өтті.
Іс-шаралар аясында әйелдерге қатысты зорлық-зомбылықты жою, адам құқықтары мен бостандықтарын қорғаудың конституциялық негіздері мен кепілдіктері, құқық үстемдігі және азаматтық қоғам мәселелері талқыланды.
Жиынға қатысушылар күн тәртібіндегі осы өзекті мәселеге қатысты өз пікір-ұсыныстарын ортаға салды. Атаулы күнге орай өткізілген іс-шараларда елімізде заң үстемдігін қалыптастыру мен құқық қорғау институттарын жетілдіруге басымдық беріліп отырғаны айтылды. Құқықтық мемлекеттің қалыптасуы адам бостандығын сақтаумен тікелей байланысты. Жиналғандар адам құқықтарын халықаралық стандарттарға сәйкес қорғаудың ұлттық тетіктерін жетілдіру, салада қолға алынып жатқан реформалар төңірегінде пікір алмасты. Сонымен қатар адам құқығын қорғау іс-шараларда белсенділік танытып жүрген мамандар шақырылып, олар өз ойларын ортаға салды.
-
Фото
-
