ӨЗ ІСІНІҢ ШЕБЕРІ
«Мұғалім мамандығы – барлық мамандықтың анасы», – демекші, ұстаз алдынан тәрбие алмайтын жан жоқ. Ұстаз берген тәрбие әрбір жанның өміріне жол сілтер шамшырақ секілді. Шәкірт санасына білім нәрін сеуіп, ел болашағының өрендерін тәрбиелеп шығару – екінің бірінің қолынан келе де бермейді. Қай заманда болсын, ұстаздарға құрмет жоғары болған.
«Адамның адамшылығы – жақсы ұстаздан», – деп ұлы Абай айтқандай, мұғалім тәрбиесі мен өнегесі оқушының болашақ азығы. Жақсы ұстазға кезігіп, тәлім-тәрбие алған шәкірт өмір майданында мойымай күресіп, болашақ жолдарда бағытынан таймасы анық. Бүгіннен немесе кешеден ғана ұлы мамандық иелеріне құрмет көрсетіліп келе жатқан жоқ, әрқашанда ұстаздықтың шоқтығы биік тұрады емес пе? Мәртебесі биік, білікті маман, ұрпақ болашағын ең бірінші орынға қоятын ұстаздардың бірі №2 Бадамша орта мектебінің физика пәні мұғалімі Құмарова Мая Аманжолқызы.
Құмарова Мая Аманжолқызы - 1973 жылы дүниеге келген. 1995 жылы Ресей Федерациясының Орск қаласындағы Т.Г.Шевченко атындағы Орск мемлекеттік педагогикалық институтын физика, математика және ИЕТ пәндері мұғалімі мамандығы бойынша бітірген.
Білім берудің озық ұстанымдарын мақсат еткен ұстаз өз тәжірибесін аудан, облыс көлемінде таратып, жас буын арасында өнегелі жол көрсетіп, олардың қабілеттерін шыңдады. 1995 жылдан бастап Қарғалы ауданының №2 Бадамша орта мектебінде сабақ беріп, қызметін де абыроймен атқарып келеді.
Дана халқымыз «Ұстазы жақсының ұстамы жақсы» демекші, ұлағатты ұстазынан білім алып, ұстаздық кәсібін таңдап, бүгінгі таңда оқушыларға білім нәрін беріп, ұлы істің игі жолында аянбай қызмет жасап жүрген шәкірттері де баршылық. Шәкірт бойындағы табиғи дарын ұшқындарын сөндіріп алмай, шығармашылық еңбек үстінде оған қанат бітіру, білімге шексіз құштарлық дәнін себу – Мая Құмарованың еңбегінің бір парағы. Осы орайда оқушыларды ғылыми-зерттеу жұмыстарына баулып, бірнеше шәкірті облыстық ғылыми жобалар байқауында жүлделі орындарға ие болды.
Халқымыздың тарихы мен әдебиетін, өнері мен мәдениетін, салт-дәстүрі мен әдет-ғұрпын, тілі мен дінін, ділін құрметтейтін саналы ұрпақ тәрбиелеу ұстаздар қауымына жүктелген зор міндет. Ал, соны барынша артығымен атқарып жүрген өз ісінің шеберіне шығармашылық толағай табыстар мен жетістіктер тілей отырып, абыройыңыз арта берсін демекпіз!
-
Фото
-
