Аумақтық ұйымдардың жаңалықтары

2024 жылғы 20-24 мамыр аралығында Маңғыстау облысының білім басқармасының ұйымдастырумен «WorldSkills Kazakhstan» ІХ республикалық чемпионатының өңірлік кезеңі «WorldSkills Aktau -2024» чемпионаты өткізілді.

Жұмысшы мамандығын дәріптеу, жұмысшы мамандығының танымдылығын және қоғамдағы беделін арттыру, өндіріс орындарындағы жас мамандардың, мектеп оқушыларының, студенттердің, ата-аналардың, бизнес өкілдерінің жұмысшы мамандығына қызығушылығын арттыру мақсатында өткізілген шараның ашылу салтанаты Ақтау қаласында «Оқушылар сарайы» ғимаратында өткізілді.

Кәсіби чемпионатқа 23 колледжден 264 студент қатысты. Олардың кәсіби шеберлігін 350-ден астам сарапшы бағалады. Чемпионат Ақтау, Жаңаөзен қалалары мен Қарақия ауданында орналасқан 17 құзыреттілік алаңдарында өткізілді.

Worldskills – жас мамандардың кәсіби біліктілігін арттыруға негізделген халықаралық жоба. Ол 1946 жылдан бері әлемнің 83 мемлекетінде өткізіліп келеді. 2014 жылғы наурызда Қазақстан Республикасы WorldSkills International мүшелігіне кіру туралы өтініш беріліп, 10 маусымда өтінім Кувейттегі қауымдастықтардың директорлар кеңесінде қаралды және Қазақстан Республикасы WorldSkills-тің 70-ші мүшесі ретінде қабылданды.

«WorldSkills» жобасы 16-22 жас аралығындағы жастарды қамтып, еліміздің әр аймағында жүргізіліп келеді. Ал қатысушыларды ҚР Оқу-ағарту министрлігі «Талап» КЕАҚ іріктеуден өткізіп, алдын ала дайындайды.

Шараның ашылу салтанатына «Қазақстандық оқу-ағарту, ғылым және жоғары білім қызметкерлерінің салалық кәсіптік одағының Маңғыстау облыстық ұйымы» ҚБ төрағасы Байымбетова Тәрбия Анайбекқызы қатысты. Әлеуметтік әріптес ретінде құттықтау сөз сөйлеп, қатысушы педагогтарға сәттілік тіледі.

Жиынға облыстық білім басқармасы, кәсіпкерлер палатасы, үкіметтік емес ұйымдар, серіктес мекемелер, техникалық және кәсіптік, орта білімнен кейінгі білім беру ұйымдарының өкілдері, облыстық кәсіби шеберлік конкурсының ұйымдастыру комитеті, сарапшылар, кәсіподақ ұйымы мен БАҚ өкілдері қатысты.

«Қазақстандық оқу-ағарту, ғылым және жоғары білім қызметкерлерінің салалық кәсіптік одағының Маңғыстау облыстық ұйымы» ҚБ