Аумақтық ұйымдардың жаңалықтары

Алты Алаштың басы қосылғанда төр ұстазға беріледі. Себебі, ұстаз – елдің болашағын тәрбиелеуші, білім нәрімен сусындатушы. Ұстаздықты ұлық тұтып, ұлағатты мамандықты еншілеген педагогтар өңірімізде аз емес. Ақтөбе облысының, Шалқар аудандық білім қызметкерлері кәсіподақ ұйымы қадірлі мамандықтың кілтін ұстаған педагогтарды қолдау мақсатында шипажайларға жолдама табыс етті.

Жазғы демалыс аталған ауданның ұстаздары үшін ерекше естеліктерге толы болмақ. Жазғы демалыс кезінде аудандық кәсіподақ ұйымы білім қызметкерлерін өңіріміздегі, Қостанай облысындағы және Оңтүстік өңірлердегі таңдаулы шипажайларға жіберді.

Емдеу-сауықтыру орталықтары шипалы минералды суымен танымал. Ұстаздар күнделікті емдік суды пайдаланып, түрлі дерттің алдын алуға бағытталған көптеген процедуралар қабылдады. Шипажайларда жүйке жүйесі, тірек-қимыл, тыныс алу жолдары өзге де ауруларды емдеу мен алдын алуға арналған түрлі процедуралар жүргізіледі.

Оқу жылының қорытындысына орай аудандық кәсіподақ тарапынан педагогика саласында көпжылдық тәжірибесі бар, өткен оқу жылында жоғары жетістіктерімен дараланған, көптеген байқауларда топ жарған ұстаздарға шипажайларға жолдама тарту етілген болатын.

Емдеу-сауықтыру шараларынан білім беру мекемелерінде жұмыс істейтін медбикелер, шаруалық меңгерушілері, зертханашылар, кітапханашылар, аспазшылар, кіші қызметкерлер де тыс қалмады.

Білім саласының қызметкерлері кешенді ем-дом алу арқылы денсаулықтарын нығайтып, еліміздің көрікті жерлеріне сапар шегіп, жазғы демалыстарын қызықты өткізді деген сенімдеміз.