АЛҒА АУДАНЫНЫҢ ҮЗДІК КӘСІПОДАҚ КӨШБАСШЫСЫ АТАНДЫ
10 қазан – Қазақстан кәсіподақтары күні мерекесіне орай Ақтөбенің Алға аудандық білім қызметкерлері кәсіподағы ұйымының ұйымдастыруымен «Үздік кәсіподақ көшбасшысы – 2024» байқауы өтті.
Байқаудың басты мақсаты – бастауыш кәсіподақ ұйымдарының рөлі мен беделін арттыру, кәсіподақ мүшелерінің кәсіби мүдделерін, еңбек құқықтарын қорғауды жандандыру.
Сайысқа қатысқан көшбасшылар ұжымында атқарылып жатқан кәсіподақ жұмысы туралы видеоролик дайындап, еңбек заңдылығы мен ұжымдық шарт және тағы да басқа сұрақтарға жауап берді. Сондай-ақ, бастауыш кәсіподақ ұйымдарының төрағалары сайыста өз өнерлерін көрсетіп, өзара бақ сынасты.
Сайыс қорытындысында Бестамақ орта мектебінің бастауыш кәсіподақ ұйымының төрағасы Гүлшарат Бекетаева жүлделі бірінші орынды жеңіп алып, "Үздік кәсіподақ көшбасшысы" сайысының облыстық кезеңіне жолдама алды.
Сайыс соңында белсене қатысқан барлық төрағаларға аудандық кәсіподақ ұйымының Алғыс хаттары мен сыйлықтары табысталды.
-
Фото
-
