АРДАГЕР ҰСТАЗ МӘРТЕБЕСІ
Қарасартов Жұмахан Кенжебайұлы Ауған соғысының ардагері, Мұнайлы ауданындағы «Шоғы Мұңалұлы атындағы №5 ЖББМ» КММ Алғашқы әскери және технологиялық пәнінің оқытушы – ұйымдастырушысы және білім саласында 20 жылдан астам уақыт қызмет етіп жүрген ардагер ұстаз. Осы жылдар ішінде өзін кәсіби дамытуда талмай ізденіп, жетілдіруден жалыққан емес.
Болашақ ұрпақты тәрбиелеуде мықты шыдамдылық пен балаларға деген сүйіспеншілікті серік еткен ұстаз, әрдайым жас мамандарға өз тәжірибесімен бөлісуге даяр тәлімгер, тәрбиеші және дос.
Ардагер ұстаз болса да көштен қалмай оқу жүйесіндегі өзгерістерді, жаңа технологиялар мен әдіс-тәсілдерді меңгеруден жалықпайды.
Мұғалімнің жетістігі әр оқушыға жеке көзқарас таба біліп, оны қолдап, өзіне сенуіне көмектесуінде. Айта кетсек, оқушылыры аудандық, облыстық және республикалық әскери-патриоттық сайыстарға қатысып жүлделі орындарға ие болып жүр. Нәтижесінде: Маңғыстау облысы әкімінің «Білім үздігі-2017» байқауына қатысып, «Үздік жетістіктер шебері» номинациясының жеңімпазы, сондай-ақ ҚР оқу-ағарту министрлігінің «Білім беру ісінің құрметті қызметкері» төсбелгісімен марапатталды.
Шәкірттерінің бойына тек білім ғана емес, патриоттық тәрбие мен құндылықтарды: еңбекті құрметтеу, адалдық, жауапкершілік және өзін-өзі дамытуға ұмтылу сынды қасиеттерді сіңіруде.
Көп жылдық тәжірибесі бар ұстаз ретінде жас әріптестерімен тәжірибе алмасуға даяр. Мамандыққа енді қадам басқан жас мамандарға үнемі қолдау көрсетіп, жігерлендірудің шебері.
Маңғыстау облысы, Мұнайлы аудандық кәсіподақ филиалы.
