ЖҰМЫСШЫ МАМАНДЫҚТАРЫ ЖЫЛЫ: МАМАНДЫҒЫ ЖҮРГІЗУШІ
Әр саланың өз қиындығы мен қызығы болады. Кәсібінің шебері болу – әрбір жанның мамандыққа деген жауапкершілігінен бастау алары сөзсіз. Жаздың аптап ыстығы мен қыстың қақаған аязында қолайсыз жағдайлардың бел ортасында жүретін еңбек адамының қызметі ерең.
Дәл осындай еңбегімен ел қошеметіне бөленіп, Шығыс Қазақстан облысы Самар ауданы «Ж.Болғанбаев атындағы Самар орта мектеп –лицейі» КММ жүргізуші болып аянбай еңбек етіп жүргендердің бірі – Рахымғазы Тоқтаров. Ол 1963 жылы 9 қаңтарда Самар ауданы, Раздольное ауылында көпбалалы отбасында дүниеге келген. Сол ауылдың 8 жылдық Раздольное мектебін бітіріп, Самардағы СПТУ-151 училищесінде 3 жыл тракторшы мамандығы бойынша білім алады. 1981 жылы отан алдындағы борышын өтеуге Петропавл-Камчатский қаласына жіберіледі. Тынық мұхит флотында 3 жыл борышын өтеп, 1984 жылы туған жеріне қайтады. Әскерден келген соң жүргізуші мамандығына 6 ай оқып, «Трансселхозтехника» ұжымынжа 3 жыл жүргізуші қызметін атқарады. Кейін елдегі өзгерістерге байланысты «Самар автобус паркіне» ауысып, ол мекеме қызметін тоқтатқанға дейін сол жерде жұмыс істейді. 2020 жылы қарашада Ж.Болғанбаев атындағы Самар орта мектеп-лицейіне автобус жүргізушісі қызметіне орналасады.
Жары Айгүлмен отбасында 1 ұл,1 қыз тәрбиелеп өсірген ата-аналар қазіргі таңда 4 немеренің сүйікті ата-әжесі.
Саналы ғұмырын көлік жүргізуге арнаған Рахымғазы Тоқтаров: «Кез келген жұмысқа немқұрайдылықпен қарау табиғатыма жат дүние. Бала кезімнен көлікке жақын өскендіктен сүйікті ісімнен бір елі ажырағым келмейді. Адал еңбектің арқасында үлкен жетістікке жетуге болатынын білемін. Өзің тазалығын сақтап, күтіп-баптаған көлігіңмен оқушыларды аман-есен үйлеріне, ата-аналарына жеткізу мен үшін үлкен міндет», - дейді.
Оқушылардың қауіпсіздігіне жауап беріп, сол қызметін адал атқарып жүрген Рахымғазы Кәрімағазыұлына алғысымыз шексіз. Адам өз несібесін еңбектен ғана табады. Қолынан келгенін аянбайтын әр адамға әркез сый-құрмет көрсетілуі тиіс. Тынымсыз тірлік етіп жүрген еңбек адамдары, солардың бірі –Рахымғазы ағамыз үлкен құрметке лайық. Зейнеткерлік жасқа таяп келе жатқан ағамызға зор денсаулық, ұзақ ғұмыр тілейміз.
-
Фото
-
