БАЛАЛАРҒА ШАТТЫҚ СЫЙЛАҒАН "АЛТЫН ЧАЖА"
Жазғы демалыстың жарқын сәттері басталды. Биыл да Оқу-ағарту, бюджеттік ұйымдар, ғылым және жоғары білім қызметкерлерінің «Жетісу» жергілікті кәсіподағы және оған қарасты аудандық, қалалық, жоғары оқу орнындағы филиалдардың қамқорлығымен өңіріміздің бірқатар кәсіподақ мүшелерінің балалары "Алтын Чажа" сауықтыру лагерінде демалуға мүмкіндік алды.
Балалардың денсаулығын нығайту мен жан-жақты дамуын қолдауды мақсат еткен кәсіподақ ұйымы жыл сайын жазғы маусымда осындай игі шараларды дәстүрлі түрде ұйымдастырып келеді. Биылғы маусымда кәсіподақ жолдамасымен 22 бала табиғаты көркем, таза ауасымен танымал "Алтын Чажа" лагеріне аттанды.
Лагерьде балалар үшін қызықты ойындар, спорттық жарыстар, шығармашылық үйірмелер мен танымдық шаралар ұйымдастырылған. Сондай-ақ, тәжірибелі тәрбиешілер мен медицина қызметкерлері демалушылардың қауіпсіздігі мен денсаулығын жіті бақылауда ұстайды.
Кәсіподақ тарапынан балалардың демалысына қомақты қаржы бөлінді. Ата-аналар мұндай қамқорлыққа ризашылықтарын білдіріп, кәсіподаққа алғыс айтты.
Мұндай игі бастамалар жас ұрпақтың денсаулығын сақтап, олардың жарқын болашағына жол ашары сөзсіз. Кәсіподақ ұйымы алдағы уақытта да балалардың демалысын ұйымдастыруды назарда ұстап, өз қамқорлығын жалғастыра бермек.
Оқу-ағарту, бюджеттік ұйымдар, ғылым және жоғары білім қызметкерлерінің «Жетісу» жергілікті кәсіподағының баспасөз қызметі
