Аумақтық ұйымдардың жаңалықтары

Шығыс Қазақстан облысы оқу-ағарту, жоғары білім, ғылым және басқа бюджеттік ұйымдар қызметкерлерінің жергілікті кәсіподағының ұйымдастыруымен, ағымдағы жұмыс жоспарына сәйкес, 2025 жылдың 14 маусымында Абай Құнанбайұлының 180 жылдық мерейтойына және Қазақстан кәсіподақ қозғалысының 120 жылдығына арналған XII облыстық спартакиадасы тікелей қызмет көрсету бастауыш кәсіподақ ұйымдары командалары арасында өтті. Спортшылар тоғызқұмалақ, шахмат, волейбол ойындарынан бақтарын сынады.
 
Спорттық сайыс үш аймақта қызу өтті: Абай атындағы ШҚ гуманитарлық колледжі, Өскемен қаласының Жоғары политехникалық колледжі және «№37 көпсалалы орта мектебі» КММ.
 
Тартысқа толы жарысқа 10 команда қатысты:
1) «Өрлеу» БАҰО» АҚ ШҚО «Кәсіби даму институты» филиалы және «Ақ ниет» мектеп-интернатының құрама командасы; 2) С.Аманжолов атындағы Шығыс Қазақстан университеті; 3) Д.Серікбаев атындағы Шығыс Қазақстан техникалық университеті; 4) Өскемен жоғары политехникалық колледжі; 5) Абай атындағы Шығыс Қазақстан гуманитарлық колледжі; 6) Шығыс Қазақстан көпсалалы колледжі; 7) Самар аграрлық-техникалық колледжі; 8) Глубокое аграрлық колледжі; 9) Үлкен Нарын колледжі; 10) Өскемен көпсалалы технология колледжі.
 
Жарыс аса қызықты әрі тартысты өтті. Спортшылардың әрқайсысы жеңіске жету үшін барын салды. Әрбір қимыл, әрбір секіру – көрермендердің шаттық айқайына ұласып жатты. Спортшылардың жүздерінде шаршаудың ізі байқалса да, олардың көздерінде жеңіске деген құштарлық әлі де жанып тұрды.
 
Спартакиада соңында қолдау көрсеткен ұйымдарға, төрешілерге, медицина қызметкерлеріне және ұйымдастыру жұмыстарына атсалысқан кәсіподақ мүшелеріне алғыс білдірілді.
Қорытындылай келе, екі номинация бойынша да жеңімпаздар анықталды. «Үздік шабуылшы» номинациясының иегері - Мұқан Қасен,  Өскемен жоғары политехникалық колледжінің оқытушысы, ал «Үздік байланыстырушы» номинацияның иегері Аслан Ағажапов, Өскемен көпсалалы технология колледжінің оқытушысы. Олар өздерінің үздік ойындарымен командаларына жеңіс сыйлады және волейбол сүйер қауымның жүрегінде ерекше орын алды. Бұл ойын волейболдың қаншалықты қызықты және тартымды екенін тағы бір мәрте дәлелдеді.
Жарыс қорытындысы бойынша жалпы командалық есепте: I орынды – С.Аманжолов атындағы Шығыс Қазақстан университеті, II орынды – Өскемен жоғары политехникалық колледжі, III орынды – Үлкен Нарын колледжі иеленді.
 
Спартакиада барысында спортшылар тек өздерінің күш-жігерін ғана көрсетіп қоймай, сонымен қатар достық қарым-қатынастарын нығайтты. Әрбір ойын – бұл жаңа таныстықтар мен тәжірибе алмасу алаңы болды.Бұл спорттық мереке әрбір қатысушының жадында ұзақ сақталып, жаңа жетістіктерге шабыт беретіні сөзсіз.
 

Шығыс Қазақстан облысы оқу-ағарту, жоғары білім, ғылым және басқа бюджеттік ұйымдар қызметкерлерінің жергілікті кәсіподағы