ҰСТАЗҒА ТАҒЗЫМ
Өмірін бала тәрбиесіне, ұрпақ болашағына арнаған ұстаздың еңбегі – мәңгілік мадаққа лайық. Сол асыл тұлғалардың бірі – Мырзахметова Данахан Камилқызы. Ол өзінің бүкіл саналы ғұмырын туған өлкесіндегі Қарнақ жалпы білім беретін мектебінде биология пәнінің мұғалімі ретінде ондаған жыл адал қызмет атқарған ұлағатты ұстаз. Еңбекқорлығы, ізденімпаздығы, әр сабағын жүрек жылуымен өткізуі арқылы талай шәкірттің жүрегін нұрландырды. Оның берген білімі – өмірлік азық, айтқан әрбір ақылы бағыт, ұстанған адамгершілік қағидалары үлгі.
Данахан Камилқызы – талапшыл да мейірімді ұстаз. Ол оқушының бойындағы қабілетті көре білетін көрегендігімен, әр баланың жан дүниесіне терең бойлайтын қасиетімен, сабырлы мінезімен ерекшеленеді. Қаншама түлек бүгінгі биігіне осы ұстаздың сенімі мен қолдауының арқасында жетті. Ұстаздың әр сөзі үміт ұялатып, әр ісі өнеге болып, әр қадамы жастарға жол көрсетіп келді. Мектеп қабырғасында тек білім ғана емес, адамдық, тәртіп, парасат сынды құндылықтарды да сіңірді.
Бүгінгі ерекше сәт – Данахан Камилқызының құрметті еңбек демалысына шығуы. Бұл – оның ұзақ жылғы маңдай терінің, табандылығының, адал қызметінің жемісі. Осынау жылдар ішінде ауыл-аймаққа, мектепке, оқушыға сіңірген еңбегінің салмағы өлшеусіз. Адам жанына шуақ сыйлайтын ұстаздық жолы – талайға үлгі болатын шынайы ерлікпен пара-пар еңбек. Оның еңбекқорлығы мен жоғары жауапкершілігі әріптестеріне өнеге, ал шәкірттеріне – мақтаныш.
Ұстаздың қадірін оның шәкірттері терең түсінеді. Кезінде партаның ар жағында отырған балалар бүгінде өмірдің әр саласында еңбек етіп, ұстазының алдында үлкен құрметпен бас иеді. Биылғы қуанышты күн – соның айқын дәлелі. Жылдар бойы тәлім берген түлектері Данахан Камилқызына деген шексіз алғысын білдіріп, қасиетті Умра сапарына жолдама табыстады. Бұл – ұстазға көрсетілген ең жоғары құрмет пен риясыз ризашылықтың белгісі. «Ұстаздың еңбегі – ұрпақтың жүрегінде» деген сөздің өміршеңдігін дәлелдейтін сәт.
Кентау қалалық кәсіподақ комитеті атынан өмірін ұрпақ тәрбиесіне арнап, сансыз шәкірттің жүрегіне із қалдырған Данахан Камилқызын шын жүректен құттықтаймыз! Қадірлі ұстазымызға мықты денсаулық, ұзақ ғұмыр, отбасының амандығын тілейміз. Қасиетті сапарыңыз қабыл болып, жаңа өмір кезеңіңіз қуаныш пен берекеге толсын! Сіздей асыл жандардың еңбегі ешқашан ұмытылмайды, құрметіңіз әрдайым биіктей беретініне сеніміміз мол!
