МЕКТЕП БАСШЫСЫНЫҢ АБЫРОЙЛЫ ЕҢБЕК ЖОЛЫ
Мектеп басшысы – білім ордасының бағыт-бағдарын айқындайтын, ұжымды бір мақсатқа топтастырып, жаңа жетістіктерге жетелейтін тұлға. Осындай жауапкершілігі зор қызметті абыроймен атқарып жүрген жан – Баймурзина Нәзігүл Қадыржанқызы. Нәзігүл Баймурзина 1993 жылы А.С.Пушкин атындағы Орал педагогикалық институтын география мен биология пәнінің мұғалімі мамандығы бойынша тәмамдаған. Еңбек жолын Қарабұтақ ауданы Ақтасты орта мектепте мұғалім және оқу-тәрбие ісі жөніндегі орынбасар ретінде бастаған.
2021 жылдан бастап Хромтау ауданындағы Тасөткел орта мектебінің директоры қызметін атқарып келе жатқан Нәзігүл Баймурзина – жаңашыл, жауапкершілігі жоғары, педагогикалық тәжірибесі мол басшы. Мектепте жаңа технологияларды тиімді пайдаланып, білім беру процесінің нәтижелілігін арттыруға ерекше көңіл бөледі. Оның басшылығымен мектептің материалдық-техникалық базасы нығайып, ауласына «Су бұрқақ», «Құрмет тақтасы», «Даналық мектебі» бұрышы орнатылды, «Білім бағы» саябағы ашылды, оқу кабинеттері интерактивті тақталар мен робототехника құралдарымен жабдықталды.
Нәзігүл Баймурзина ұжым мүшелерінің кәсіби дамуына ерекше көңіл бөледі. Ол «Үздіксіз даму» жобасының жетекшісі, сондай-ақ «Бірлесіп оқыту» жобасын іске асыруда мектептің тәжірибесін аудан көлемінде таратады.
Оның еңбегі бірнеше мәрте марапатталған: облыстық және республикалық деңгейдегі алғыс хаттар мен құрмет грамоталары, пәндік олимпиадалар мен байқаулардағы дипломдар, 2025 жылы Хромтау ауданының 90 жылдығы төсбелгісі. Бұл марапаттар Нәзігүл Баймурзинаның білім беру саласындағы адал еңбегі мен педагогикалық шеберлігін дәлелдейді.
Нәзігүл Баймурзина ұжым мүшелерінің еңбегін бағалап, мерекелерде марапаттау жүйесін тұрақты түрде жүргізеді. Мектептегі іс-шаралар мен жетістіктер «Мектеп тынысы» журналында жарияланып, мектептің дамуына үлес қосып келеді. Оның басшылығымен мектеп педагогикалық тәжірибе алмасуда, оқушылардың шығармашылық және ғылыми қабілеттері дамып, ұжым бірлік пен ұйымшылдық үлгісін көрсетеді.
Баймурзина Нәзігүл Қадыржанқызының біліктілігі мен жауапкершілігі – мектептің жетістігі мен ұйымшыл ұжымның тірегінің басты кепілі.
