ӨЗ ІСІНІҢ ШЕБЕРІ
Білім беру жүйесінің дамуы мен сапасын арттыруда әр мұғалімнің еңбегі айрықша рөл атқарады. Жүрегімен бала тәрбиелеп, өзінің кәсібіне адал қызмет етіп келе жатқан сондай ұстаздардың бірі – Ақтөбе облысы, Шалқар ауданы, Қорғантұз жалпы орта білім беретін мектебінің бастауыш сынып мұғалімі, педагог-зерттеуші Оразаева Раушан Ердіғалиқызы. Ол өзінің әдістемелік ізденісімен, шәкірт тәрбиелеудегі табандылығымен және мамандығына деген шынайы сүйіспеншілігімен әріптестеріне үлгі болып келеді.
Раушан Оразаева Ақтөбе облысы Шалқар ауданына қарасты Байқадам елдімекенінде дүниеге келіп, 2004 жылы Қорғантұз орта мектебін үздік аяқтады. 2007 жылы Ақтөбе гуманитарлық колледжін, кейін Қ.Жұбанов атындағы мемлекеттік университетті тәмамдап, бастауыш сынып мұғалімі мамандығын алды. 2009 жылдан бері Қорғантұз мектебінде үздіксіз еңбек етіп келеді.
Шебер педагог бастауыш сыныптың төрт бірдей буынын білімнің келесі сатысына дайындап, әр баланың бойындағы қабілетті ашуды, білімге деген қызығушылығын арттыруды басты міндеті санайды. Сабақтарын мазмұнды, қызықты өткізіп, оқушыларды ізденімпаздыққа, еңбексүйгіштікке баулып келеді. Оның алғашқы шәкірттері Ақтөбе мен Астана қалаларында жоғары білім алып, бүгінде түрлі салада жемісті еңбек етуде. Бірнеше шәкірті облыстық және республикалық «Дарынды оқушы» олимпиадаларында І орын иегері атанып, «Мың бала – 2021» жобасында жүлделі орындарға ие болды. Сынып оқушылары мектепішілік шараларда белсенділігімен көзге түсіп, ұстаз сенімін ақтап келеді.
Раушан Оразаева облыстық пәндік олимпиаданың ІІІ орын, республикалық «PedTriumph» олимпиадасының І орын жүлдегері атанып, жылдар бойы мектеп, аудан, облыс деңгейіндегі марапаттар мен кәсіподақ ұйымының алғыс хаттарына ие болған тәжірибелі ұстаз.
Бүгінгі таңда Оразаева Раушан Ердіғалиқызы – тәжірибесі толысқан, әр оқушының жан-жақты дамуына ықпал ете алатын, білім сапасын арттыруға бағытталған жаңашыл көзқарасқа ие педагог. Шәкірттерінің жетістігі – еңбегінің айқын дәлелі, ал ұстаздыққа деген адалдығы – жас мамандарға үлгі.
