Аумақтық ұйымдардың жаңалықтары

Еңбек қатынастарындағы дауларды дер кезінде және тиімді шешу – әлеуметтік тұрақтылықты қамтамасыз етудің басты шарттарының бірі. Осы орайда келісу комиссиясы мүшелерінің құқықтық сауаттылығын арттыру, келіссөз жүргізу мәдениетін қалыптастыру және еңбек дауларын шешудің заманауи тәсілдерін меңгерту мақсатында Оқу-ағарту, бюджеттік ұйымдар, ғылым және жоғары білім қызметкерлерінің «Жетісу» жергілікті кәсіподағы арнайы оқыту семинарларын ұйымдастыруда.

Аталған бастама аясындағы алғашқы шаралар Ескелді ауданында өткізіліп, кейін Текелі қаласында жалғасын тапқан болатын. Бүгінгі күні бұл оқыту жұмыстары Көксу және Қаратал аудандарында да ұйымдастырылып, ерекше белсенділікпен өтті.

Семинарға білім беру мекемелерінің келісу комиссияларының мүшелері, кәсіподақ жетекшілері және мекеме басшылары қатысты. Жиын барысында облыстық кәсіподақ ұйымының төрағасы Мэлс Төлепбергенов кәсіподақтың әлеуметтік әріптестікті нығайту бағытында атқарып жатқан жұмыстарымен таныстырып, келісу комиссияларының рөлін күшейтудің маңыздылығын атап өтті.

Сонымен қатар облыстық кәсіподақ ұйымының заңгер-кеңесшісі Әсет Қайырхан қатысушыларға еңбек дауларының негізгі түрлері, оларды қарау тәртібі, келіссөз жүргізу әдістері, комиссия мүшелерінің жауапкершілігі жөнінде кең көлемде түсіндірме берді.

Көксу мен Қаратал аудандарында өткен оқыту барысында тыңдаушыларға келісу комиссиясының жұмысын ұйымдастыру, хаттама жүргізу тәртібі, шешімдердің заңдық күші, сондай-ақ еңбек заңнамасындағы өзекті өзгерістер егжей-тегжейлі түсіндірілді. Семинар ашық диалог форматында өтіп, қатысушылар сауалдарын қойып, өз тәжірибелерімен бөлісуге мүмкіндік алды.

Кәсіподақтың осы бастамасы еңбек ұжымдарындағы келісім мәдениетін нығайтуға, жұмыс беруші мен қызметкер арасындағы серіктестікті дамытуға бағытталған маңызды қадам болып табылады. Оқыту нәтижесінде келісу комиссиясы мүшелерінің кәсіби дайындығы күшейіп, еңбек дауларын әділ, уақтылы және заң талаптарына сай қарау қабілеті артты.

Алдағы уақытта «Жетісу» жергілікті кәсіподағы аймақтағы барлық өңірлерді қамти отырып, келісу комиссияларының жұмысын жетілдіруге бағытталған осындай семинарларды тұрақты түрде өткізуді жоспарлап отыр.

Жетісу облыстық ұйымының баспасөз қызметі