ХАЛЫҚ МҰҒАЛІМІ –ХАЛЫҚ ЖАДЫНДА
Атырау облысы, Махамбет ауданының Алға ауылында жұртшылықтың есінде қаларлықтай тәлім-тағылымы мол әсерлі шара өтті. Бұл шара – туған жерінің топырағында табанының мәңгі өшпес ізін қалдырып, күмбезді көк аспан төрінде жұлдызы жарқырап тұратын, елі үшін ерен еңбек етіп, халықтың ықылас-ілтипатына бөленген азаматтың бірі де бірегейі, еліміздің педагогикалық қауымына қадірлі де сыйлы болған, Алға ауылының тумасы, қазыналы өлкенің аяулы перзенті, ұлағатты ұстаз Атырау облысының Құрметті азаматы, «КСРО Халық мұғалімі», профессор Құсиын Айтқалиевті еске алуға арналды.
«Атырау облысы білім және ғылым қызметкерлерінің кәсіптік одағы» қоғамдық бірлестігінің ұйымдастыруымен және Махамбет ауданының әкімдігі мен мәслихатының қолдауымен өткен бұл шараға қала мен облыс аудандарынан келген білім беру мекемелерінің ұлағатты ұстаздары, кәсіподақ ұйымдарының жетекшілері, Құсиын ағаның әріптес шәкірттері, ардагерлер шақырылды.
Осыдан екі жыл бұрын тоқсан жастың төріне таянған шағында өмірден өткен есімі аңызға айналған абыз ұстаздың тұрған үйінің маңдайшасына ескерткіш тақта қою рәсімімен басталған шара Алға орта мектебінде жалғасты. Қонақтар атаулы мектептегі «КСРО Халық мұғалімінің» өмірі мен ғылыми-педагогикалық және шығармашылық ғұмырнамасынан сыр шертетін «Ұстаз жолы» атты шараға қатысты. Мектептің акт залында «Қазақфильм» киностудиясының Құсекеңнің өмірі туралы ХХ ғасырдың 80-ші жылдарының аяғында түсірілген деректі фильмді тамашалады. Сол арқылы «Үздік ұстаз – ғибратты үлгі» демекші, жүзінен мейірім нұры төгілген, шәкірттері жүрегінде құдіретке айналған ұстаз еліміз мұғалімдерінің бет алысы мен бағдарын анықтайтын Темірқазықтай болып, жарқыраған жарық жұлдызға айналғандығын ұғынғандай әсерде болды.
Бұдан соң «Алға» ауылдық мәдениет үйінде «КСРО Халық мұғалімі», Атырау облысының Құрметті азаматы, профессор Құсиын Айтқалиевке арналған «Қалдырған ізің мәңгілік» атты салтанатты жиында облыстық шара қонақтарына жерлес қаламгер Сәтқали Әуелбаевтың бір актілі, үш көрністі «Аманат» драмасынан үзінді қойылды. Сахналық қойылымды кезінде өзінің туған ауылындағы халық таетрының негізін қалаушы атақты ұстаздың шәкірттері, түрлі мамандық иелері өнер көрсетті. Онда Құсиынның балалық және жастық шақтағы бейнесі көрермен алдында шынайы сахналанды.
Шығармашылық шабытымен, жаңашыл ізденісімен, ерен еңбегімен танылған ұстаз, тұңғыш рет атаулы мектеп жұмыстарын ұйымдастырушы, ғұмыры ұрпағына өнеге болған Құсиын Айтқалиевке арналған салтанатты шараның алғашқы құттықтау сөзін «Атырау облысы білім және ғылым қызметкерлерінің кәсіптік одағы» қоғамдық бірлестігінің төрағасы, тарих ғылымдарының кандидаты Қылышбай Сүндетұлы алып, ұстаз есімін ұрпақтар жадында есте қалдыру мақсатында атқарылып жатқан жұмыстарға тоқталды. Ол Құсиын Айтқалиевқа арналған «Үздік педагогикалық қызметі үшін» төсбелгісіне үміткер педагогтардың құжаттарын саралайтын комиссия шешімімен облыс бойынша үздік 34 ұстаздың осы марапатқа лайықты деп танылғандығын жеткізді.
Салалық кәсіподақ төрағасы №1 «Үздік педагогикалық қызметі үшін» төсбелгісімен Х.Досмұхамедов атындағы Атырау университетінің профессоры, филология ғылымдарының докторы Қадыр Жүсіпті марапаттады. Осындай құрметке Атырау қаласындағы №4, №22 №34, № 38 орта мектептердің мұғалімдері Барша Әубекерова, Гүлжан Кунарова, Нәсіп Қадырғалиева, Гульбаршин Ботагариева, №15 мектептің директоры Қали Махамбетов, И.Тайманов атындағы орта мектептің мұғалімі Ғалия Айтжанова, Құрманғазы ауданы Ә.Сәрсембаев атындағы орта мектептің мұғалімі Роза Төлемісова, Жылыой ауданы №2 жалпы орта білім беретін мектептің мұғалімі Нұргүл Қорғанбаева, Индер ауданының М.Әуезов атындағы орта мектептің ұстазы Нұржамал Аймұратова, «Дина Нұрпейісова атындағы халықтық музыка Академиясы» Атырау музыка колледжінің оқытушысы Нәсіпқали Төлегенов, Махамбет ауданындағы Д.Төленов атындағы орта мектептің мұғалімі Лиза Қайырғали және басқалар ие болды.
Салтанатты шарада Махамбет ауданы әкімінің орынбасары Светлана Аманшиева, аудандық мәслихаттың хатшысы Қайыржан Мажиев, облыстық білім беру басқармасы әдістемелік орталығының бөлім басшысы Нұргүл Жайкина және басқалары сөйлеп, Құсиын Айқалиұлының өнегелі өмір жолының кейінгі жастар үшін үлгі екендігін айтып, марапатталған әріптестерін құттықтады, ізгі тілектерін жолдады.
Ғибратты ғұмырын жас ұрпақ тәрбиесіне арнаған абыз да аңыз ағаның ұрпақтары атынан ұстаздық жолын жалғастырушы ұлы Айдын Құсиынұлы өз ризашылығын тебірене жеткізді.
Ауқымды шара соңында ауылдың өнерлі жастары жергілікті ақын-сазгерлердің ұстазға арнаған әндерін шырқап, қонақтарға көтеріңкі көңіл-күй сыйлады.
