.jpg)
«ҰСТАЗДЫҚ – ҰЛЫ ҚЫЗМЕТ»
Осындай атаумен «Алматы облыстық білім, ғылым және бюджеттік ұйымдар қызметкерлерінің жергілікті кәсіподағы» қоғамдық бірлестігі салтанатты қабылдауын ұйымдастырды.
Ұстаздар және Кәсіподақтар күніне орай ұйымдастырылған шараға білім беру мекемелерінің басшылары, сала ардагері, аудандық, қалалық филиалдары мен бастауыш ұйымдарының төрағалары және кәсіподақтың белсенді мүшелері қатысты.
Салтанатты қабылдауды Оқушылар сарайының бүлдіршіндері ұстаздарға арналған өлеңдерімен ашып, шәкірттік тілектерін жолдады. Алматы облыстық білім, ғылым және бюджеттік ұйымдар қызметкерлерінің жергілікті кәсіподағының төрағасы Мэлс Төлепбергенов алғашқылардың бірі болып, кәсіподақтың мүшелерін мерекемен құттықтады. Ұстаздардың еңбегіне алғыс білдіріп, қоғамдық жұмыстағы белсенділіктерін жоғары бағалады. Педагогтардың сапалы білім беру ісіне шығармашылық табыс тіледі.
Алматы және Жетісу облыстық кәсіподақтар орталығының төраға орынбасары Қаһарман Еркінайұлы Қазақстан Республикасы кәсіподақтар Федерациясының бастамасы негізінде «Еңбек адамы», «Қалың қалай бастауыш?» акциялары тұрақты ұйымдастырылып, бастауыш ұйымдармен байланыс орнатылғанын, әр саланың үздіктері туралы мақалалар әлеуметтік желілерге жарияланғанын айтты.
Ал, Жетісу облыстық білім беруді дамыту оқу – әдістемелік орталығының әдіскері, бастауыш кәсіподақ ұйымының төрағасы Әсел Әуезова жаңа оқу жылындағы өзгерістерге тоқталып, салтанатты қабылдауға қатысушыларды қос мерекемен құттықтап, жылы лебізін білдірді.
Мерекелік шарада кәсіподақ мүшелеріне Қазақстандық салалық білім және ғылым қызметкерлері кәсіподағының төс белгісі, облыс әкімінің, білім басқармасының және облыстық кәсіподақ ұйымының Құрмет грамоталары табыс етілді.
Сонымен қатар, облыстық кәсіподақ ұйымының «Ең үздік филиалы», «Ең үздік техникалық инспекторы», «Ең үздік бастауыш кәсіподақ ұйымы», «Ең үздік әйелдер істері жөніндегі комиссиясы», «Ең үздік жастар Кеңесі», «Ең үздік әлеуметтік әріптесі», «Ең үздік бақылау-тексеру комиссиясы», «Ең үздік ұжымдық шарт», «Ең үздік педагогикалық еңбек ардагерлері Кеңесі», «Бұқаралық ақпарат құралдарымен байланыс орнатқан филиал» номинациялары бойынша үздіктері анықталып, марапатталды.
Салтанатты қабылдауда облыстық филармонияның әншілері, Қ. Байсейітов атындағы саз колледжінің білімгерлері мен Оқушылар сарайының бүлдіршіндері ән салып, би билеп, өнерлерін көрсетті.
«Алматы облыстық білім, ғылым және бюджеттік ұйымдар қызметкерлерінің жергілікті кәсіподағы» ҚБ баспасөз қызметі
