КӘСІПОДАҚ ЖОЛДАДЫ – МӘСЛИХАТ ҚОЛДАДЫ
Ұстаздар мерекесі және 10 қазан – Кәсіподақтар күні қарсаңында жас ұрпаққа білім беру саласында аянбай еңбек етіп жүрген мұғалімдерді марапаттау ісі жалғасын табуда. Соның айғағы, «Атырау облысы білім және ғылым қызметкерлерінің кәсіптік одағы» қоғамдық бірлестігі Х.Досмұхамедов атындағы Атырау университетінің Құрметті профессоры, Қазақстан Республикасы Білім беру ісінің үздігі, Қазақстанның үздік өлкетанушысы, белгілі исатайтанушы Шамғонов Аманкелдіні мерейлі 80 жасқа толуына орай «Құрманғазы ауданының Құрметті азаматы» атағына ұсыну жөнінде қаулы қабылдап, оны аудан әкімшілігіне жіберген еді.
Жуырда өткен аудандық мәслихатта облыстық салалық кәсіподақ ұйымының ұсынысы шешімін тапты. Біз үшін үлкен қуаныш!
А.Шамғонов – Құрманғазы ауданы, Дыңғызыл ауылдық кеңесінде 1942 жылы дүниеге келген. 1968 жылы С.М. Киров атындағы мемлекеттік университетінің (қазіргі әл-Фараби атындағы ҚазМУ) тарих факультетін бітірген. Сол жылы Гурьев мемлекеттік педагогикалық институтында еңбек жолын бастап, КСРО тарихы және дүниежүзі тарихы кафедрасында оқытушы, аға оқытушы, доцент қызметтерін атқарды. Көп жылғы ғылыми ізденістерінің нәтижесінде «Исатай Тайманұлының ұрпақтары» атты монографияның, «Исатай және Махамбет батырлар бастаған көтеріліс және оны мектепте оқыту» атты әдістемелік оқу құралдарының және 100-деген ғылыми мақалалардың авторы. 1970 – 2000 жылдары студенттердің «Атамекен» атты ғылыми-өлкетану бірлестігін басқарды, бірнеше жас ізденушілерді ғылыми жұмысқа тәрбиеледі.
«Ұстаздың орны – төр» деп қазақтың ұлы ақыны Мағжан айтқандай, профессорге зор құрмет көрсеткені үшін «Атырау облысы білім және ғылым қызметкерлерінің кәсіптік одағы» қоғамдық бірлестігі Құрманғазы ауданның әкімі Мурзиев Марат Бисенғалиұлына және барша мәслихат депутаттарына зор Алғыс білдіреді.
«Атырау облысы білім және ғылым қызметкерлерінің кәсіптік одағы» қоғамдық бірлестігінің баспасөз қызметі
