ЕҢБЕК ҚАУІПСІЗДІГІ – БАСТЫ НАЗАРДА
«Алматы облыстық білім, ғылым және бюджеттік ұйымдар қызметкерлерінің жергілікті кәсіподағы» қоғамдық бірлестігінің Панфилов аудандық филиалы еңбек қауіпсіздігі мен еңбекті қорғау жөніндегі инспекторларға арналған семинар өткізді.
Шара Х.Хамраев атындағы орта мектебінде өтіп, оған аудандық білім бөлімінен Қ.Темірханұлы, аудандық төтенше жағдайлар бөлімінің инженері азаматтық қорғау лейтенанты Ж.Әділқан, «Талдықорған акционерлік электржүйелерінің тасымалдау компаниясы» акционерлік қоғамының электр қуаты жүйесінің аға шебері Ж.Жұмағұлов, аудандық кәсіподақ филиалының еңбекті қорғау инспекторы Х.Бөгенбаев, білім мекемелеріндегі еңбек инспекторлары мен шаруашылық ісі жөніндегі орынбасарлары қатысты.
Семинарды аудандық кәсіподақ филиалының төрағасы М.Тұрлыбеков жүргізді. Төраға қазіргі уақытта кәсіподақта еңбек қаупісіздігі бойынша атқарылып жатқан жұмыстарға қысқаша тоқтала келіп, өткізіліп отырған шараның мән-мақсатын баяндады.
Алғашқы сөз кезегін алған аудандық кәсіподақ филиалы бойынша қоғамдық еңбек инспекторы Х.Бөгенбаев «Білім мекемесіндегі еңбек қаупсіздігі мен еңбекті қорғау жөніндегі инспекторлың қызметі туралы» тақырыбында баяндама жасады.
Панфилов аудандық төтенше жағдайлар бөлімінің инженері азаматтық қорғау лейтенанты Ж.Әділқан білім ошақтарындағы өрт қауіпсіздігі бойынша кеңінен түсінік беріп, төтенше жағдай орын алған кездегі іс-әрекет туралы айтып, өрт сөндіру құралдарымен жұмыс жүргізу ретін көрсетті. Сонымен қатар, «Талдықорған акционерлік электржүйелерінің тасымалдау компаниясы» акционерлік қоғамының электр қуаты жүйесінің аға шебері Ж.Жұмағұлов электр энергиясының қазіргі таңдағы қолданысы туралы айтып, қойылған сұрақтарға тиянақты жауап берді.
Осыдан кейін қатысушылар өздерін толғандырып жүрген сұрақтарын қойып, өзара пікір алмасып, бірқатар өзекті мәселелер бойынша өздерінің ұсыныстарын білдірді. Атап айтқанда, білім мекемелерінде электрик мамандарының қажеттігі және оларды оқыту, мұғалімдер мен техникалық жұмыскерлерге арналған курстарды ұйымдастыру, т.б.
Жиын соңында аудандық кәсіподақ филиалының төрағасы Мақытбек Әділұлы аталған ұсыныстардың назарға алынатындығын айтып, іс-шараны қорытындылады.
«Алматы облыстық білім, ғылым және бюджеттік ұйымдар қызметкерлерінің жергілікті кәсіподағы» қоғамдық бірлестігінң Панфилов аудандық филиалы
