МАҢҒЫСТАУ ОБЛЫСТЫҚ ҰЙЫМЫНЫҢ КЕҢЕЙТІЛГЕН КЕҢЕСІ
Бүгін Қазақстандық салалық білім және ғылым қызметкерлері кәсіподағының Маңғыстау облыстық ұйымының кеңейтілген кеңесі өтті. Жиында облыстық кәсіподақ ұйымының төрайымы Тәрбия Байымбетова 2021 жылы атқарылған жұмыстар туралы есеп берді.
Тәрбия Анайбекқызының мәліметінше, бүгінде облыстық кәсіподақтың мүшелігінде 5 аудандық, 2 қалалық және облыстық 38 бастауыш кәсіподақ ұйымы бар. Облыстағы білім саласы қызметкерлерінің құқығын қорғайтын ұйымға 32 мыңға жуық педагог мүше. Кәсіподақ қызметінің басты бағыты – кәсіподақ мүшелерінің әлеуметтік - экономикалық және еңбек құқықтарын қорғау. Бұл жұмыстар облыстық білім басқармасы, аудандық білім бөлімдері, оқу орындарының басшылары сынды әлеуметтік әріптестермен бірге атқарылуда.
Осы жылы Маңғыстау облыстық білім саласының 1242 қызметкерінен кәсіподаққа түрлі өтініш түскен. Оның ішінде 226 мұғалімге заңгерлер тиісті құқықтық кеңес берді. Төтенше жағдай жарияланып, білім саласы жаңаша форматқа көшкен тұста мамандар тәулік бойы мұғалімдер тарапынан түскен сауалдарға жауап берді.
Үздік ұстаздарды ынталандыру мақсатында «Кәсіподақ қолдаушы күш» айдарымен бірнеше мәрте шара ұйымдастырылды. Көпбалалы, аз қамтылған отбасыларға қаржылай қолдау көрсетілді. Мемлекеттік және кәсіби мерекелер, білім беру ұйымдарының мерейтойлары қарсаңында сала майталмандары ескерусіз қалған жоқ.
Өрт жағадайына ұшыраған, жақындары қайтыс болған кәсіподақ мүшелерінің жақындарына да материалдық көмек көрсетілді,
Кәсіподақ төрайымының баяндамасынан соң кәсіподақ қозғалысын дамытуға үлес қосқан әлеуметтік әріптестер-білім беру ұйымдарының басшылары ҚР Білім және ғылым министрлігінің Құрмет грамотасы мен Алғыс хаттары, ҚР Кәсіподақтар Федерациясының «Еңбек озаты» медалімен, Салалық кәсіподақтың Мұнайлы ауданы кәсіподақ ұйымы филиалы мен бастауыш кәсіподақ ұйымдарының көшбасшылары төсбелгілер, Құрмет грамоталарымен және сыйақылармен марапатталды.
Шараға облыстық білім басқармасы басшысының маманы, бастауыш кәсіподақ ұйымының төрайымы Күлбалаева Айтгүл, аудандық, қалалық білім беру мекемелерінің басшылары қатысты. Олар әріптестік аясында облыстық кәсіподақпен бірлесіп атқарып жатқан жұмыстары туралы айтып өтті.
Шара барысында «Екі жұлдыз» облыстық онлайн байқауының жеңімпаздары марапатталып, байқау жеңімпаздары өз өнерлерін паш етті.
Облыстық білім беру мекемелеріндегі әлеуметтік әріптестер, бастауыш кәсіподақ ұйымының төрағалары, белсенді кәсіподақ ұйымының жастары ұйымдастырушыларға ризашылықтарын білдіре отырып, кәсіподақ мүшелерінің әлеуметтік - экономикалық құқықтары мен мүдделерін қорғаудағы қызметтеріне сәттілік, шығармашылық табыстар тілеп тарқасты.
«Қазақстандық салалық білім және ғылым қызметкерлері кәсіптік одағының Маңғыстау облыстық ұйымы» ҚБ
-
Фото
-
