КЕЛІСІМДІ НАСИХАТТАУҒА АРНАЛҒАН СЕМИНАР-КЕҢЕС
Жамбыл облысы білім және ғылым қызметкерлерінің жергілікті кәсіподағы мен облыстық білім басқармасының бірлескен жұмыс жоспарына сәйкес 2022 жылдың 25 наурыз күні Байзақ ауданындағы Н.Киікбаев атындағы мектеп-гимназияның, ал 28 наурызда Жамбыл ауданындағы Ю.Гагарин атындағы мектеп-лицейінің мәжіліс залында «Еңбек және салалық заңнаманы, әлеуметтік әріптестік актілерін тиімді қолдану тетіктері» тақырыбында көшпелі семинар-кеңес өтті.
ҚР Кәсіподақтар федерациясының бастамасымен «Әлеуметтік әріптестік жылы» аясында өткен жиынға аудандық білім бөлімінің басшысы бастаған білім мекемелері мен ұйымдарының басшылары, бастауыш кәсіподақ ұйымдарының жетекшілері, аудандық білім бөлімінің қаржы-экономикалық және кадр қызметінің мамандары қатысты.
Семинар-кеңесті ашқан Жергілікті кәсіподақ төрағасы Ерұлан Мағзымбеков кәсіподақтың заңмен және жарғылық құжаттармен көзделген жұмыс бағыттарына тоқталып, сала өкілдері-кәсіподақ мүшелерін құқықтық қорғау бойынша атқарылған жұмыстарды айтты. Өз сөзінде сала өкілінің кәсіподақ мүшелігінде болғандағы тиімді және тиімсіз тұстарын атап көрсетті және ұжымда кәсіподақ ұйымы болуының ұтымды жақтарына тоқталды.
Бұдан соң сөз алған Кәсіподақтың құқықтық қызметінің басшысы Берік Баймағамбетов еңбек және салалық заңдылықтардағы өзгерістерге, облыстық білім басқармасымен бірге 2021-2023 жылдарға арналып қабылданған әлеуметтік әріптестік актілері және оларға енгізілген өзгертулер мен толықтыруларға тоқталды. Ұжымдық шарттар мен Келісімге енген өзгерістерді саладағы түйткілдерді шешу мақсатында тиімді пайдалану, тәжірибеде қолдану сұрақтарын түсіндірді.
Жиын соңы білім саласындағы еңбек қатынастарының өзекті мәселелері аясындағы сұрақ-жауап сағатына ұласты.
Жамбыл облысы білім және ғылым қызметкерлерінің жергілікті кәсіподағының баспасөз қызметі
