ЗАЙСАН АУДАНЫНДА БАСКЕТБОЛДАН ЖАРЫС ӨТТІ
Ұзақ жылдар әйелдер арасында соның ішінде білім саласы бойынша спорттың баскетбол түрінен жарыс өткізілмегенін ескерсек, кенжелеп қалған спорт түрін педагогтар мен қамту қызметкерлері кәсіподақ мүшелері арасында қайта жаңғыртып, білім саласының қызметкерлерін салауатты өмір салтын ұстануға шақырған жарысты ұйымдастырған кәсіподақ ұйымы екенін ерекше атап өткен жөн. Жарысқа 150 жуық кәсіподақ ұйымының мүшесі қатысты. Жарыс барысында кәсіподақ ұйымы түскі ас ұйымдастырды.
Спорттық іс-шара Зайсан ауданының М.Дәуленов атындағы мектеп-интернатының спорт залында салтанатты түрде ашылды. Спорттық шараға Зайсан аудандық білім бөлімінің басшысы М.Мұратқызы, аудандық білім беру қызметкерлерінің кәсіподақ ұйымының төрағасы Қ.Сайранов және бастауыш кәсіподақ ұйымының төрағалары қатысты.
Үш топқа бөлінген команда өзара ойын өрнектерін көрсете білді. Әр топтан үздік болып шығу үшін спорт сүйер кәсіподақ мүшелері тартысты ойын өрнегін көрсетті. Үш топтан іріктеліп шыққан мықты командалар жүлделі орындарға таласты.
Финалдық ойынға шыққан М.Дәуленов, М.Ломоносов, Х.Мұстафина атындағы мектеп-лицейінің кәсіподақ мүшелері өте тартысты әрі керемет ойын көрсете білді. Ұжымдарын қолдауға келген мектеп директорлары мен мұғалімдер ұжымдық жарыста әріптестеріне жеңіске деген талпыныстарына дем бере білсе, Сарытерек орта мектебінің директоры Р.Турабаева өзі басшылық жасап отырған ұжымынан әйелдер командасын жасақтап, өзі бас болып тамаша ойын көрсетті.
Тартысты додада әйелдер арасындағы баскетбол жарысында бірінші орынды М.Дәуленов атындағы мектеп-интернатының кәсіподақ мүшелері, екінші орынды Х.Мұстафина атындағы мектеп-лицейінің командасы, үшінші орынды М.Ломоносов атындағы мектептің командасы жеңіп алды.
Жүлделі орын алған командалар ақшалай және бағалы сыйлықтармен, грамотамен марапатталды. Ерекше ойын өрнегін көрсеткен, жеңіске деген құштарлығын танытқан «Балдәурен» балабақшасының кәсіподақ мүшелері «Жеңіске деген құштарлығы үшін» номинациясымен және ақшалай сыйлықпен марапатталды. Жас мұғалімдер мен жас директорларға үлгі болып, тамаша ойын көрсеткен Сарытерек орта мектебінің директоры Р.Турабаеваға да бағалы сыйлық табысталды.
Е.Зағыпаров,
Зайсан аудандық білім беру
қызметкерлерінің кәсіподақ
ұйымының мүшесі.
ШҚО .
