ТӘУЕЛСІЗДІК ЖӘНЕ КӘСІПОДАҚ
Жуырда еліміздің айтулы мерекесіне арналып «Атырау облысы білім және ғылым қызметкерлері кәсіптік одағының Махамбет аудандық комитеті» филиалының ұйымдастыруымен «Қ.Қарашаұлы атындағы Сарайшық орта мектебі» КММ-де «Тәуелсіздік жылдарындағы кәсіподақ қызметі: ізденістер мен жетістіктер» тақырыбымен аудандық бастауыш кәсіподақ ұйымдарының форумы болып өтті. Мақсаты: бастауыш кәсіподақ ұйымдарының еңбек ұжымдарындағы мәртебесін нығайту, кәсіподақ мүшелерінің бірлігі мен ынтымақтастығын дамыту, бастауыш кәсіподақ ұйымдарының кәсіподақ жұмысындағы озық тәжірибелерін насихаттау, бастауыш кәсіподақ ұйымдарының төрағаларының қоғамдық қызметін қолдау болып табылды.
Аудандық бастауыш кәсіподақ ұйымы форумының басты ерекшелігі – форумға әр жылдарда бастауыш кәсіподақ ұйымдарының төрағалары болып қызмет атқарған зейнет жасындағы ардагерлер мен ұстаздар шақырылып, құрмет көрсетілді. Сондай-ақ, жиынға «Атырау облысы білім және ғылым қызметкерлері кәсіптік одағы» қоғамдық бірлестігінің бас маманы З.Қ. Бекмұхамбетова қатынасып, жас ұрпаққа білім мен тәрбие беруде, кәсіподақ қызметін дамытуға қосқан зор үлестері үшін Салалық кәсіподақтың және облыстық ұйымның Құрмет грамотасын табыстады.
Форум бағдарламасына сай ауданның әр білім ошағынан келген бастауыш кәсіподақ ұйымының төрайымдары баяндамаларын қорғап, кәсіподақ қызметіндегі өз тәжірибелерімен бөлісті.
Жиынның келесі бөлімінде «Атырау облысы білім және ғылым қызметкерлері кәсіптік одағының Махамбет аудандық комитеті» филиалының төрайымы В.Б. Қабышева, «Қ.Қарашаұлы атындағы Сарайшық орта мектебі» КММ педагог-психологы Н.Раулқызы дөңгелек үстел ұйымдастырып, келелі мәселелерді қозғады, тұшымды ой-пікірлер айтылды, ұсыныстар берілді.
Форумға қатынасушылар «Сарайшық» мәдениет үйі көркемөнерпаздарының өнерін тамашалап, «Хан ордалы Сарайшық» мұражай қорығына экскурсия жасады.
«Атырау облысы білім және ғылым қызметкерлері кәсіптік одағы» ҚБ
