ҰЛЫҚ МЕРЕКЕГЕ АРНАЛДЫ
Кеншілер қаласында білім саласы қызметкерлерінің еңбегі еленді. Сәтбаев қалалық кәсіподақ ұйымының төрайымы Гүлнәр Ілиясованың бастамасымен ұйымдастырылған мерекелік жиынға Жезқазған аймақтық білім және ғылым қызметкерлерінің жергілікті кәсіптік одағының төрағасы Марат Қоңырбаев және білім бөлімінің басшысы Берик Акишбеков қатысып, әріптестерін ұлық мерекемен құттықтады.
Үш он жылдықтың ішінде Қазақстан әлемнің алпауыт елдерімен иық тіресетіндей айбынды мемлекетке айналуында ұстаздар қауымының үлесі ұшаң-теңіз. Білім беру жүйесі қоғамның әлеуметтік-экономикалық дамуында жетекші рөл атқарса, ұстаз - білім мен біліктің ұйытқысы. Міне, сондықтан да Тәуелсіздік тойы қарсаңында мұғалімдерге көрсетіліп жатқан құрмет пен қошемет те ерекше.
Марапат төріне көтерілгендер ҚР білім және ғылым Министрінің Алғыс хатымен, облыстық білім басқармасының Құрмет грамотасымен мадақталып, "Қарағанды облысының білім саласына еңбегі сіңген қызметкері" төсбелгісін кеудесіне тақты. Сонымен бірге, кәсіподақ қозғалысын дамытудағы жеке еңбегі үшін бірқатар әріптесіміз "Білім және ғылым қызметкерлерінің кәсіподағына сіңірген еңбегі үшін" медалімен, Жезқазған аймақтық кәсіподағының Құрмет грамотасымен марапатталды. Жылдың қорытындысы бойынша бастауыш кәсіподақ ұйымының ең үздік төрайымы анықталды.
Мерекелік концертке ұласқан марапаттау салтанатынан сәтбайлық мұғалімдер көтеріңкі көңіл-күймен тарқасты!
