ЖЕЛТОҚСАНШЫЛАРҒА ҚҰРМЕТ КӨРСЕТІЛДІ
«Жезқазған аймақтық білім және ғылым қызметкерлерінің жергілікті кәсіптік одағы» ҚБ-нің Жезқазған қалалық білім қызметкрелерінің кәсіподақ ұйымы қалалық білім бөлімімен бірлесе Тәуелсіздің 30 жылдығына арнап мерекелік шара өткізді.
Ел Президенті Қасым-Жомарт Тоқаевтың ақ батасымен шәкірттеріне есігін айқара ашқан мамандандырылған «Өркен» мектеп-интернатының мәжіліс залында шымылдығы түрілген кездесудің алғашқы құттықтауын алған Жезқазғанның бас педагогі Жеңіс Әлмағанбетов Қазақстанның тұрақты дамуы мен кемелдену жолында әріптестерінің адал еңбегі барын тілге тиек етіп, алғысын білдірді.
Әуезді ән, күмбірлеген күй мен әсем би ажарландыра түскен мерекелік шараның маңызын Тәуелсіздіктің жаршысы болған желтоқсаншыларды марапаттау салтанаты арттыра түсті. Осыдан 35 жыл бұрын жас та болса алаңға шығып, «Қазақты қазақ басқарсын!» деп өз ойын еркін жеткізуден тайсалмаған Алтынай Әзімбаева, Гуля Әжібекова, Гүлдарайым Мубаракова, Жанаргүл Әбілдаева, Мәрзия Жакупова, Ақмарал Жантенова «Білім және ғылым қызметкерлерінің кәсіподағына сіңірген еңбегі үшін» төсбелгісін кеудесіне тақса, Жанат Ақшалова Жезқазған қаласының Құрмет грамотасымен марапатталды.
Сондай-ақ, аталмыш жиында облыстық «Жыл мұғалімі» байқауының жүлдегері Динара Капарова мен «Шапағат» орденімен мадақталған Абай Оразға да құрмет көрсетілді. Білім беру жүйесін дамытуға және өскелең ұрпаққа тәрбие мен білім берудегі қол жекізген табыстары үшін жезқазғандық ұстаздардың бірқатары Қарағанды облысы әкімінің Құрмет грамотасын және «облыстық білім басқарқармасының Құрмет грамотасын, Алғыс хатын иеленді.
Жезқазған аймақтық білім және ғылым қызметкерлерінің
жергілікті кәсіптік одағының баспасөз қызметі
жергілікті кәсіптік одағының баспасөз қызметі
