ОТБАСЫ БАҚЫТТЫҢ МЕКЕНІ БОЛУЫ ТИІС
Бүгінде кейбіріміз бір төбе мен бір іргені бөліскен көршілеріміздің тұрмыстық зорлық-зомбылықтың құрбаны болғанын көрмесек те естіп жүргеніміз бар. Қабырғаның арғы бетіндегі айқай пәтерімізге жетсе-дағы «ерлі-зайыптылардың арасына ессіз ғана түседі» деген қағиданы ұстанамыз. Көп жанжал дер кезінде жетпеген көмектің салдарынан қайғылы аяқталып жатытыны тағы бар. Бұл сөзімізге ерінің соққысынан өлген әйел, ата-ана тепкісінен аяқ-қолы сынған балалар туралы күнбе-күн тарап жатқан хабар дәлел болса керек.
Халықаралық ұйымдардың мәліметіне сүйенсек, әлемде 5 минут сайын бір ана мен бала зорлық-зомбылық құрбаны болса, Қазақстан Республикасында жылына 400 әйел ерінің тепкісінен көз жұмады екен. Сондықтан, отбасындағы зорлық-зомбылық бүгінде біздің елде ашық айтыла бастады. Онымен күрес те күшейді. «Әйелдерге қарсы зорлық пен зомбылықсыз 16 күн» деп аталатын республикалық акция тұрмыстық зорлық-зомбылықтың алдын алу жолында атқарылып жатқан ауқымды шаралардың бір парасы.
Аталмыш акция шеңберінде тұрмыстық зорлық-зомбылықтың алдын ала отырып, отбасылық құндылықтарды насихаттау жолында Жезқазған аймақтық білім және ғылым қызметкерлерінің жергілікті кәсіптік одағы 7 желтоқсанда «Қоғамдағы зорлық-зомбылық» тақырыбындағы тренинг элементтері бар әлеуметтік-профилактикалық дәріс өткізді.
Жезқазған, Сәтбаев, Балқаш, Қаражал қалалық және Ұлытау, Жаңаарқа, Шет пен Ақтоғай аудандық кәсіподақтарының, сондай-ақ бастауыш кәсіподақ ұйымдарының төраға/төрайымдары мен белсенділері қатысқан жиында Қазақстандық салалық білім және ғылым қызметкерлері кәсіподағы жанындағы еңбек етуші әйелдердің ісі бойынша комиссияның мүшесі Гүлнәр Ілиясова баяндама жасады. Комиссия жұмысынан аз-кем хабар берген Гүлнар Жұмабекқызы кәсіподақ өз мүшелерін қандай мәселе болмасын қолдауға дайын әрі ашық екенін жеткізді.
Кездесудің келесі бөлімін жүргізген білікті психолог Лилия Монастырская әріптестерін зорлық-зомбылықтың түрлерімен таныстырып, үйдің, отбасының берекесін қашыратын қарым-қатынастан шығудың жолдарын көрсетті, сонымен бірге, бала тәрбиесіне қажетті бірқатар нұсқаулықтар берді.
Қоғамдағы зорлық-зомбылық» тақырыбындағы тренинг элементтері бар әлеуметтік-профилактикалық дәріс соңында білім саласының қызметкерлері психологтің өзін-өзі бағалауға арналған тестіне белсене қатысып, өздерінің осал тұстарын біліп, оны жеңу бойынша маманнан құнды кеңес алды.
Жезқазған аймақтық білім және ғылым қызметкерлерінің
жергілікті кәсіптік одағының баспасөз қызметі
жергілікті кәсіптік одағының баспасөз қызметі
