ҰСТАЗ ЕҢБЕГІ – ЗЕЙНЕТ
Қазақ поэзиясының көрнекті өкілі Қадір Мырза Әлінің мынадай бір өлеңі бар еді: «Қалдырмай ескерусіз бір ісінде, талантты бағалаңдар тірісінде». Дәл ұстаздарымызға айтылғандай!
Ағымдағы жылдың 2 желтоқсан күні «Атырау облысы білім және ғылым қызметкерлерінің кәсіптік одағы» қоғамдық бірлестігі аймақтың білім беру ісіне өз үлестерін қосып жүрген бір топ ұстазға сый-сияпат жасады. Алдымен Ш.Сариев атындағы өнер музейінде «Сырлы дүние» атты көрмесімен 70 жылдық мерей тойын атап өткен ҚР Суретшілер одағының мүшесі, ҚР Көркем Академиясының академигі, ҚР Мәдениет қайраткері Қамбарбек Хасенұлы Амановқа арналған салтанатты жиында облыстық салалық ұйымның Алғыс хаты және республиканың емдеу-сауықтыру орнына тегін жолдама табыс етілді.
Дәл осы күні «Атырау облысы білім және ғылым қызметкерлерінің кәсіптік одағы» қоғамдық бірлестігінің Құрмет грамотасы мен Алғыс хаты Исатай ауданындағы «Жалпы білім беретін Аққыстау орта мектебі» КММ-нің ұжымында болған кездесуде мекеме директоры Халенова Тамара Молдашқызы мен математика пәнінің мұғалімі Төлеуғалиева Гүлнар Мантихқызына табыс етілді.
Т.М. Халенова қарапайым ұстаздықтан балабақша меңгерушісі, аудандық білім бөлімінде әдіскер, мектеп директоры болып абыроймен қызмет етуде. Осы уақыт аралығында мектепті көркейту үшін бар күш жігерін жұмсап, материалдық базасының жақсаруына өз үлесін қосуда. Басшылық қызметте өзінің кәсіподақ ұйымына деген оң көзқарасын танытып келеді. Бастауыш кәсіподақ ұйымының жұмыстарына қолдау көрсетіп отырады. Кәсіподақ мүшелерінің әлеуметтік жағдайын зерттеу-зерделеу арқылы оларға қолдау көрсету, жазғы демалыс орындарына жіберу, еңбек ақыларын уақытылы алу, түрлі шараларда марапаттау рәсімдерінде бастауыш кәсіподақ ұйымын қолдап отырады.
Г.М. Төлеуғалиева 1988 жылдан бері Аққыстау орта мектебінде математика пәні мұғалімі болып қызмет жасап келеді. Ол-өз ісін жетік білетін, терең білімді, тәжірибелі маман, жақсылыққа, жаңалыққа жаны құмар, еңбекқор, шәкірт жүрегіне жол таба білген ұстаз. Ол мектеп өміріндегі көптеген жетістіктердің ұйытқысы бола білді, өзі де көптеген жетістіктерге жетті. Сабақтары республикалық деңгейде бірнеше конференциялар жинағына енгізілді. Республикалық «Ең үздік авторлық бағдарлама» сайысына қатысушы сертификатын алды. Аудандық, облыстық, республикалық кәсіби сайыстардың ІІ, ІІІ орын жүлдегері. І дәрежелі «Үздік педагог» байқауының иегері, мектеп бастауыш кәсіподағының ұйымдастырумен өтетін барлық шаралардың белсенді мүшесі. Тәуелсіздіктің 30 жылдығы аясында ұстаздар еңбегін ұлықтау жалғасын табуда!
