ЖАЛЫНДЫ ЖАСТАРҒА – АЛҒЫС ХАТ
Жастар – қай заманда, қай елде болмасын асқақ арман мен үміт, биік ар мен өр намыстың символы. Мемлекетіміздің жаңа келбетін қалыптастыратын қозғаушы күштің жаңа белестерге деген ұмтылысы жаңа идеялардың туындауына себепші болады. Ал, жаңа идея қазақ елінің жаңаруына бағытталған нық қадамдарға бастайды. Сондықтан, белсенді буын өкілдерін ұлы істерге жігерлендіру үшін – ынталандыру маңызды.
Осы қағиданы Жезқазған аймақтық білім және ғылым қызметкерлерінің жергілікті кәсіптік одағы қатаң ұстанады. Бұл сөзімізге Қазақтсан Республикасының Тұңғыш Президент күні қарсаңында Жезқазған жоғары политехникалық колледжінде өткен жас мамандарды марапаттау салтанаты дәлел.
Бұл жолы Жезқазған аймақтық білім және ғылым қызметкерлерінің жергілікті кәсіптік одағының Төрағасы Марат Қоңырбаевтың Алғыс хатын Нұрсұлтан Кеңесов пен Арайлым Нұртуғанова иеленді.
Тасымалдауды ұйымдастыру және қозғалысты басқару жөніндегі арнайы пәндердің оқытушысы Арайлым Битуғанқызы мен есептеу техникасы және бағдарламамен қамтамасыз ету мамандықтарының арнайы пәндер оқытушысы Нұрсұлтан Нұртайұлы жүрек қалауымен таңдаған ұстаздықты жас та болса абыроймен атқаруда. Жаңалықты жатсынбай қабылдап, үнемі ізденіс үстінде жүретін жастар қоғамдық шараларға да асқан белсенділікпен қатысып, жоғары ұйымдастырушылық қабілеті мен сахналық мәдениетімен көзге түсіп жүр.
Шәкірттерін кәсіби бағдарлап қана қоймай адамгершілік рухта тәлім беріп, жақсы қасиеттерді бойына дарытып жүрген Нұрсұлтан Кеңесов пен Арайлым Нұртуғанованың бүгінгі бейбіт күннің қадір-қасиетін шын сезіне білетін ұлтжанды ұрпақ тәрбиелеуде қосар үлесі әлі де зор.
