ҚОРДАЙДАҒЫ КӨШПЕЛІ СЕМИНАР
Тәуелсіздік – ең басты құндылығымыз және ол бәрінен қымбат. Бұл күндері өтіп жатқан Жамбыл облысы білім және ғылым қызметкерлерінің жергілікті кәсіподағының аудандық комитеттерінің пленумдары да ел тәуелсіздігінің мерейлі датасына орайластырылған. Қарашаның 10 күні өткен Қордай аудандық комитетінің V Пленумы соның дәлелі.
Пленум жұмысына дейін «Еңбек және салалық заңнамадағы өзгерістер: 2021-2023 жылдарға жасалған әлеуметтік әріптестік актілерін жүзеге асыру мәселелері» тақырыбында семинар өтті. Кәсіподақтың оқу семинарына аудандық білім бөлімінің басшысы Санат Аширбеков, білім мекемелері мен ұйымдарының басшылары, есеп бөлімінің мамандары, бастауыш ұйым жетекшілері қатысты.
Кәсіподақтың Қордай аудандық филиалында 83 бастауыш ұйымға біріккен 5735 сала өкілі есепке алынған. Аудандағы білім мекемелеріндегі бастауыш кәсіподақ ұйымы өз ұжымдарында тұрақтылықты қалыптастырып, ыңғайлы орта құруда басты рөл атқарып отыр. Бастауыш ұйымдар тиімді әлеуметтік серіктестікті ұйымдастырып, ұйымның әр мүшесіне көңіл бөліп, олардың шығармашылық дамуына жағдай жасауда. Аудандық кәсіподақ комитетінің көмегімен құқықтық, материалдық қолдау көрсетіп, өзінің кәсіподақ мүшесінің қорғаушысы екенін сезіндіруде. Бұл туралы алқалы жиында есепті баяндама жасаған аудандық филиал төрайымы Қарлығаш Қыпшақбаева айтты.
Биыл білім мекемелері мен ұйымдарында еңбек нормаларының сақталуына байланысты 31 қоғамдық бақылау мен тексеру жүргізіліп, 128 еңбек заңдылығын бұзу фактілері анықталған. 2021 жылы құқықтық қызметтің экономикалық эффектісі – 11 963 281 теңгені құрайды. 322 сала өкілі сауықтыру шараларымен қамтылған. Жарыссөзге шыққан №43 Б.Момышұлы атындағы орта мектептің директоры Г.Абдуллина, аймақтық құқықтық инспектор Б.Алпысбаев, №6 негізгі мектептің қазақ тілі және әдебиеті пәні мұғалімі, бастауыш кәсіподақ ұйымының төрайымы М.Омарова да айтылған мәліметтерді нақтылап, бірқатар ұсыныстар айтты. №22 мектептің бастауыш кәсіподақ ұйымының төрайымы Татьяна Лаврова кәсіподақ көшбасшыларының қатары жыл өткен сайын жасарып келе жатқанын айтып, қоғамдық ұйымның ұстаз мәртебесін ұлықтау, құқығын қорғау бойынша қарқынды жұмыс істеп келе жатқанын жеткізді.
Іс-шара соңында облыстық ұйым төрағасы Ерұлан Мағзымбеков кәсіподақ ұйымының қызметін жандандыруға қосқан үлесі үшін бірқатар кәсіподақ белсенділерін марапаттады.
П.Бақыт,
Жамбыл облысы.
