БІЛІМДІ БИІККЕ ШЫҒАРҒАН ТҰЛҒА
Ағымдағы жылдың 12 қарашасында Атырауда Қазақстан Республикасының 30 жылдығы аясында Ы.Алтынсарин атындағы Ұлттық білім Академиясы, «Х.Досмұхамедов атындағы Атырау университеті» КеАҚ және «Атырау облысы білім және ғылым қызметкерлерінің кәсіптік одағы» қоғамдық бірлестігі ұйымдастыруымен КСРО Халық мұғалімі, Атырау облысының Құрметті азаматы, профессор Қ.Айтқалиевқа арналған «Рухани жаңғыру: Жаңартылған білім беру және тәрбие» атты тақырыбында республикалық ғылыми-тәжірибелік конференция өтті.
Алдымен конференцияға қатысушылар энциклопедист-ғалым Х.Досмұхамедов ескерткішіне гүл шоғын қою рәсімін жасады. Содан соң Атырау университетінде үш бағытта секциялық жұмыстар жүргізіліп, олардың қорытындылары конференцияның пленарлық мәжілісіне ұсынылды.
Аталмыш мәжілісті «Атырау облысы білім және ғылым қызметкерлерінің кәсіптік одағы» қоғамдық бірлестігінің төрағасы, тарих ғылымдарының кандидаты Қ.Сүндетұлы кіріспе сөз сөйлеп ашты.
Конференцияға қатысушыларды Х.Досмұхамедов атындағы Атырау университеті басқарма төрағасы – ректор С.Н. Идрисов, Ы.Алтынсарин атындағы Ұлттық Білім академиясының президенті, PhD докторы, халықаралық академияның педагогикалық білім бойынша корреспондент мүшесі Ғ. Б.Бисембаев, Қазақстандық салалық білім және ғылым қызметкерлері кәсіподағының төрайымы А. Мұқашева құттықтады.
Конференцияда Атырау облыстық білім басқармасының басшысы С.Ы. Есенғалиев, белгілі қоғам қайраткері, т.ғ.д., профессор Ө.О. Озғанбаев, «Атырау облысы кәсіподақтар орталығы» аумақтық кәсіподақтар бірлестігінің төрағасы І.Ұ. Баймұхановтар құттықтау сөз сөйлеп, конференцияны ұйымдастырушыларға шексіз алғыстарын білдірді және күн тәртібіндегі мәселелер төңірегінде ой өрбітті.
Күн тәртібіне сай ғылыми-тәжірибелік конференцияда Х.Досмұхамедов атындағы Атырау университетінің профессоры, п.ғ.к. Ш.Н. Нағимов «Халық мұғалімі Қ.Айтқалиевтың тағылымы», Абай атындағы Қазақ ұлттық педагогикалық университеті, педагогика және психология институты директорының орынбасары, п.ғ.к., қауымдастырылған профессор А.Қ. Дүйсенбаев «Қ.Айтқалиевтың ағартушылық мұралары», Ы. Алтынсарин атындағы Ұлттық білім академиясының «Қазақ тілі», «Қазақ әдебиеті» және Қазақстан тарихы пәндері зертханасының меңгерушісі, философия докторы, (PhD), қауымдастырылған профессор А.Қ. Жүндібаева «Қазақстанда халық ағарту ісін және мемлекеттік тілді дамытудағы Қ.Айтқалиевтың қосқан үлесі туралы», Назарбаев университетінің профессоры, п.ғ.д. Г.С. Құрманбай «Абай – ұлтымыздың мәдени капиталы», Атырау қаласындағы М.Бекмұхамбетов атындағы орта мектептің қазақ тілі мен әдебиеті пәні мұғалімі, республикалық «Үздік педагог – 2021» атағының иегері Ж.Р. Бекбусинова «Мұғалімнің шығармашылық әлеуеті-кәсіби бастамашылығын дамыту» атты тақырыбында баяндамалар жасады.
Конференция барысында 1990 жылы «Қазақфильм» студиясының қызметкерлері Ж.Әзізханов, Н.Ахтанов және С.Келдібаев түсірген жарты сағаттық деректі фильмінен үзінділер көрсетілді.
Пленарлық мәжілісте бір топ белсенді педагогтарға Алғыс хаттармен, барлық қатысушыларға сертификат пен конференция материалдарының жинағы табыс етілді.
Конференция соңында тиісті қарар қабылданды.
-
Фото
-
