ЕУРАЗИЯ ҰЛТТЫҚ УНИВЕРСИТЕТІНДЕ ЖАҢА ТӨРАҒА
2021 жылдың 26 қазан күні Қазақстандық салалық білім және ғылым қызметкерлері кәсіптік одағының Л.Н. Гумилев атындағы Еуразия ұлттық университеті қызметкерлері кәсіподақ ұйымы филиалында кезектен тыс есептік-сайлау конференциясы өткізілді.
Л.Н. Гумилев атындағы ЕҰУ қызметкерлері кәсіподақ ұйымының төраға м.а. Бәкіжан Болатбекұлы Сейдеш конференция жұмысын ашып, 2020-2021 жылға есептік баяндама жасады.
Конференция жұмысына «Қазақстандық салалық білім және ғылым қызметкерлері кәсіптік одағы» Қоғамдық Бірлестігінің төрайымы Айгүл Мақсатқызы Мұқашева, Басқарма мүшесі – әлеуметтік-мәдени даму жөніндегі проректор Дихан Қамзабекұлы, Думан Рамазанұлы Айтмағамбетов - Басқарма мүшесі – Стратегиялық даму жөніндегі проректор, және шақырылған қонақтар қатысты.
Есеп беру кезеңіндегі ЕҰУ кәсіподағының жұмысын қорытындылай отырып, университеттің әлеуметтік-мәдени даму жөніндегі проректоры Дихан Қамзабекұлы сөз алды, Айгүл Мақсатқызы конференцияның жұмысына оң баға бере отырып, алдағы уақытта кәсіподақ ұйымының жұмысына және ұжымға шығармашылық табыс тіледі.
Бұдан әрі кәсіподақ ұйымының төрағасын сайлау рәсімі өткізілді. Сайлау конференциясына төрағалығына Еркебұлан Еркінұлы Нұғыманов, Бәкіжан Болатбекұлы Сейдеш кандидатуралары ұсынылып, және сәулет құрылыс факультетінің профессоры Тұрашев Ақжайық Сейітқожанұлы өз кандидатурасын ұсынды. Сайлау нәтижесі ашық дауыс беру арқылы қорытындыланып, Б.Б. Сейдештің кандидатурасы басым дауысқа ие болып, Л.Н. Гумилев атындағы Еуразия ұлттық университеті қызметкерлерінің бастауыш кәсіподақ ұйымы Филиалының төрағасы болып сайланды.
Б.Б. Сейдеш – Заң факультеті халықаралық құқық кафедрасының аға оқытушысы, заң факультетінің кәсіподақ төрағасы м.а.қызметін атқарған. 2007 жылдан бастап университет кәсіподақ ұйымының мүшесі болып табылады.
«Қазақстан Республикасының білім беру жүйесін дамытуға қосқан зор жеке үлесі үшін» 2014 жылы және «Тәуелсіз Қазақстанның рухани және әлеуметтік дамуы жолында қол жеткізген табыстары мен білім беру саласында қосқан үлесі үшін» Қазақстан Республикасы Білім және ғылым министрінің Құрмет грамоталарымен марапатталған. «Білім қызметкерлерінің кәсіподағына сіңірген айрықша еңбегі үшін» алтын төсбелгісінің иегері.
Университет ұжымы Бәкіжан Болатбекұлы Сейдештің осындай жауапты қызметіне жаңа жетістіктер және толағай табыстар тілейді.
Л.Гумилев атындағы ЕҰУ бастауыш кәсіподақ ұйымы филиалы
-
Фото
-
