КҮШТІ БАСТАУЫШ ҰЙЫМ-ҚУАТТЫ КӘСІПОДАҚ
Кәсіподақтың заңмен және жарғылық құжаттармен көзделген жұмыс бағыттарының бірі – кәсіподақ мүшелерінің құқықтық сауаттылығын арттыру, саладағы түйткілді мәселелерді шешудің құқықтық әдіс тәсілдерін меңгеру болып табылады. Атылмыш бағытта Қызылорда облысында «Күшті бастауыш ұйым-қуатты кәсіподақ» тақырыбында семинар болып өтті. Семинарға бастауыш кәсіподақ ұйымының төрағалары және «Үздік бастауыш кәсіподақ ұйымы» байқауы бойынша жолдама иеленген кәсіподақ белсенділері қатысты.
Құқықтық семинарды облыстық ұйым төрағысының орынбасары, заңгер Нургүл Өтегенова жүргізіп, ҚР Еңбек заңнамасын қолдану, ұжымдық шарт талаптарының орындалу барысы, жеке еңбек дауларын шешу жөніндегі келісу комиссиясын құру, жұмысын ұйымдастыру, келісім комиссиясының іс - құжаттарын рәсімдеу мен жүргізу және еңбек дауларын сотқа дейінгі және сотта қарау тәжірбиесі туралы түсіндірме жасады.
Сонымен қатар жарты жылдық жұмыс барысындағы құқықтық жұмыстарға тереңірек тоқталды. Жалпы кәсіподақтың құқықтық қызмет жөніндегі мамандарымен қарқынды жұмыс жүргізіліп келеді.
Баса назар аударып, айта кететін көрсеткіш: 2020 жылдың қорытындысына сәйкес экономикалық тиімділік 252 400 851 теңгені құрап, кәсіподақ мүшелеріне толық қайтарылды.
Жыл басынан қоғамдық қабылдау, бақылау жұмыстарын жүргізу барысында олқылықтардың, яғни қателіктер қатары азайғаны байқалды.
Жарты жылдықта кәсіподақ мүшелерінен 600-ге жуық өтініштер келіп түсті. Өтініштердің басым бөлігі ақылы еңбек демалысының берілу тәртібі және есептелуі, сабақтың оқыту ерекшеліктеріне қарай кезекші сыныптардағы сағаттардың төленуі, Бастауыш әскери дайындық жөніндегі оқытушы ұйымдастырушылардың жалақыларының есептелуі, жүктемелік сағаттарға қарай жұмыс уақытының тәртібі, еңбек шарттарына байланысты болды.
Құқықтық семинар соңында қатысушыларға рөлдік тапсырмалар ұсынылып, ситуациялық сұрақтар берілді. Яғни әрбір төраға көшбасшылық қабілеті арқылы өзінің күнделікті жұмыс барысында кездесетін жағдаяттарды оңтайлы шешу жолдарымен бөлісіп, әріптестерімен тәжірибе алмасты.
“Кәсiптiк одақтар туралы” Қазақстан Республикасының заңында «Кәсіподақ мүшелерінің, мүшелік ұйымдарының еңбек және әлеуметтік құқықтары мен мүдделерін білдіру және қорғау», - кәсіподақтардың негізгі міндеті ретінде белгіленген. Демек, кәсіподақ - қатардағы қызметкердің еңбек қатынастарындағы өз мүддесін қорғауда басты арқасүйері болмақ.
Қазақстандық салалық білім және ғылым қызметкерлері
кәсіподағының Қызылорда облыстық ұйымы
кәсіподағының Қызылорда облыстық ұйымы
-
Фото
-
