ЖАСТАР АРАСЫНДА ВОЛЕЙБОЛДАН ЖАРЫС
Жуырда Х.Досмұхамедов атындағы университеттің «Жайық» спорт кешенінде волейболдан жарыс өтті. Жарыстың құрметіне ие болған Ахметов Ізгілік Жоламанұлы туралы бір ауыз сөз. Ол – Құрманғазы ауданының тумасы. 1994 жылы осы университеттің «Дене шынықтыру» мамандығын бітірген. Алғашқы еңбек жолын С.Мұқанов атындағы орта мектепте дене тәрбиесі пәнінің мұғалімі болып бастап, Ш.Уәлиханов атындағы орта мектептің оқу ісінің меңгерушісі қызметін абыроймен атқарды. 2001 жылдан Х.Досмұхамедов атындағы университеттің дене тәрбиесі кафедрасында оқытушы, аға оқытушы, кафедра меңгерушісі қызметінде болды. Ұзақ жылғы ғылыми ізденістерінің нәтижесінде әл-Фараби атындағы Қазақ Ұлттық мемлекеттік университетінің Ғылыми кеңесінде «Қазақ спортының дамуындағы ұлттық патриотизм идеиясы» тақырыбында (2009) кандидаттық диссертация қорғап, философия ғылымдарының кандидаты атағын иеленді.
10 жылдан астам университет студенттері кәсіподақ комитетінің төрағалығына сайланып, жастар арасында қызу саяси-тәрбие жұмыстарын жүргізді. Студенттердің әлеуметтік жағынан қорғалуына белсене араласып, республикалық спорт-өнер фестивальдерінде жүлделі орын алуларына қол жеткізді.
Волейболдан өткен жарыста жеңімпаз анықталмады, тек әріптестері үшін сайыстың Ізгілік Жоламанұлына арналып өткені олар үшін үлкен жеңіс болды.
Бұл күні Атырау облысы білім және ғылым қызметкерлері кәсіптік одағының төрағасы Қ.Сүндетұлы жарыс иесіне құрмет көрсетіп, ескерткіш сыйлығын тапсырды.
«Атырау облысы білім және ғылым қызметкерлерінің кәсіптік одағы» ҚБ
