ДЕМАЛЫСЫМЫЗ СӘТТІ ӨТТІ
Жуырда Х.Досмұхамедов атындағы Атырау университетінің бір топ оқытушылары «Атырау облысы білім және ғылым қызметкерлері кәсіптік одағы» қоғамдық бірлестігінің қолдауымен «Денсаулық» сауықтыру орталығында тегін демалдық.
Алматы облысының Іле Алатауы аймағындағы тау бөктерінде орналасқан демалыс орны көптің көңілінен шықты. Әйгілі Түргендегі табиғаттың тамаша көріністері мен таудың таза ауасы, мамандардың қамқорлығы демалушыларға керемет әсер етті.
Демалыс орны әкімшілігі тарапынан Түрген сарқырамасына, Шарын шатқалына, Есік музейіне, Есіл көліне саяхат ұйымдастырылды. Әйгілі «Алтын Адам» атты сақ жауынгері табылған өңірдің тарихи-мәдени, табиғи сырларынан да ақпараттар алуға мүмкіндік болды.
Соңғы уақытта Атырау университетінің кәсіподақ ұйымының қолдауымен педагогтарды әлеуметтік қорғау бойынша тиімді шаралар іске асырылуда. Атап айтқанда, осы жылдың өзінде «Мерейлі Мерке» (Жамбыл), «Ақжайық» (Орал), «Денсаулық» (Алматы), Манкент (Шымкент) шипажайларында 5 әріптесіміз тегін демалып келді. Бұдан басқа да, кәсіподақтың 50 пайыздық жеңілдігімен де демалыс орындарына бірнеше жолдамалар берілді.
Атырау облысы білім және ғылым қызметкерлері кәсіптік одағының ұжымына оқу жылының қорытындысымен түрлі жетістіктерге қол жеткізген ұстаздар мен қызметкерлерге тамаша тарту жасаған демалушылар атынан ризашылық білдіремін.
Г.Қайырғалиева,
Х.Досмұхамедов атындағы Атырау университетінің профессоры.
-
Фото
-
