КӘСІПОДАҚ КӨШБАСШЫСЫ – ҰЖЫМ ЖАНАШЫРЫ
Степногорск қаласының С.Сейфуллин атындағы №5 көпсалалы мектеп – лицейінің бастауыш сынып мұғалімі Абежанова Нұржамал Арысбекқызы осы мектепте 17 жылдан бері еңбек етіп келеді. 10 жылға жуық мектеп – лицейдің бастауыш кәсіподақ ұйымының төрайымы қызметін атқаруда.
Бүгінгі таңда, кәсіподақ - жұмысшылардың еңбек құқықтарын қорғайтын жалғыз ұйым, ол әлеуметтік кепілдіктердің орындалуына қол жеткізіп, ұжымның жағдайын жақсартып отыр. Кәсіподақ ұйымының негізгі міндеттерінің бірі - ұжымның бірігіп жұмыс жасауын ұйымдастыру . Барлық қызметкерлер: әкімшілік, техникалық қызметкерлер мен ұстаздардың жұмыстан тыс уақытын дұрыс өткізіп, түрлі мәселелерді бірлесе шешуіне көмектесіп, ауызбіршілікте болуын қолдайды.
Нұржамал Арысбекқызы кәсіподақ белсенділерімен тығыз жұмыс жүргізіп отырады. Сонымен қатар кәсіподақ комитеттерінің кеңейтілген мәжілістерін өткізіп, оларды әркез марапаттайды. Кәсіподақ комитетіндегі мәдени-көпшілік және спорт шаралары тоқтаған емес. Ұжым қала деңгейіндегі мәдени-көпшілік және спорт жарыстарына да жиі қатысады. Әдістемелік бірлестіктер байқауынан 2-орынға иеленсе, көркемөнерпаздарға арналған шараларда топ жарып, салауатты өмір салтын насихаттау мақсатында өткізілген қалалық "Мұғалім" спартакиадасына қатысып, волейболдан, теннистен түрлі марапаттарға ие болды.
Нұржамал Арысбекқызы ұстаздардың кәсіби мерекелерінде қаладағы педагогикалық еңбек ардагерлерін құрметтеуді игі дәстүрге айналдырған. «Қарты бар үйдің қазынасы бар»,- дегендей Қарттар күні мерекесін де қалт жібермейді. Қарттарды арнайы шақырып, концерттік номерлер көрсетіп, шағын сыйлықтар жасайды. Кәсіби мерекеде мерейтой иелері мен ұстаздарды құттықтау да назардан тыс қалмайды.
Нұржамал Арысбекқызы облыс және қалалық кәсіподақтың Алғыс хаттары мен марапаттауларының иегері.
"Біз ұжым болып адал қызметі үшін №5 көпсалалы мектеп – лицейінің кәсіподақ ұйымының төрайымы Абежанова Нұржамал Арысбекқызына алғыс айтамыз. Ол әрдайым ұсынысымызды мұқият тыңдауға дайын, кәсіподақ комитетінің пікіріне құрметпен қарайды, мүмкіндігінше көмектесуге тырысады. Осындай көшбасшымен жұмыс істеу оңай, ұжымның пайдасына тиімді, бізде бірдей мақсаттар мен міндеттер бар, тек өзара көмек арқылы нәтижелерге қол жеткізуге болады. Кәсіподақ комитетінің құрамы барлық бағыттар бойынша жұмысын жалғастырады деп үміттенеміз және ұжымның барлық қажеттіліктеріне әртүрлі бағыттар бойынша жауап беруге, мүмкіндігінше қолдауға тырысады деген сенімдеміз", - дейді әріптестері.
Нұржамал Арысбекқызына шығармашылық табыс тілей отырып, ұжымның береке – бірлігі арта берсін демекпіз!
З.Курсанова,
Салалық кәсіподақтың Ақмола облыстық ұйымының
Степногорск қалалық филиалының төрайымы.
-
Фото
-
