АТҚАРУ КОМИТЕТІНІҢ ОТЫРЫСЫ ӨТТІ
Алматы облыстық білім және ғылым қызметкерлерінің кәсіподақ ұйымы көшпелі Атқару комитетінің отырысын өткізді. Айдынды Алакөлдің жағасында ұйымдастырылған жиынға аудандық, қалалық филиалдардың төрағалары мен облыстық ұйымның аппарат қызметкерлері қатысты.
Алқалы жиынның күн тәртібінде Кербұлақ және Алакөл аудандық филиалдарының жанынан құрылған жастар Кеңесінің атқарған жұмыстары, Талдықорған өнеркәсіптік индустрия және жаңа технологиялар колледжіндегі өндірістік кеңестің жұмысы, кәсіподақ мүшелерінің тарапынан түскен арыз-шағымдардың сипаты және шешілу жолдары туралы мәселелер қаралды.
Облыстық ұйымның төрағасы М. Төлепбергенов жиынды ашып, 2020-2021 оқу жылының аяқталуымен барлық әріптестерін құттықтап, кәсіподақ ұйымының 2021 жылдың алты айлығында атқарған жұмыстарына тоқталды.
Сондай-ақ Ұйғыр, Еңбекшіқазақ аудандарда филиалдар ашылып, облыстық кәсіподақ ұйымының қатары бірнеше бастауыш кәсіподақ ұйымымен толыққанын жеткізіп, алдағы жоспарлармен бөлісті.
Күн тәртібіндегі мәселелер бойынша облыстық ұйымның бас маманы М. Жұмабек, техникалық инспекторы Д. Шакенов, заңгер-кеңесшісі Е.Қасымбеков баяндама жасап, кәсіподақтың жанынан құрылған жастар Кеңесінің жүзеге асырған тың идеялары, жас мамандардың қоғамдық жұмыстағы белсенділігі, сала қызметкерлерінің тарапынан түскен арыз-шағымдардың қаралу жолдары, білім беру мекемелерінде қауіпсіздік шараларының сақталуы жайында толық ақпарат берді.
Көрсетілген мәселелер бойынша Атқару комитетінің мүшелері бірауыздан қажетті қаулыларды қабылдады.
Алматы облыстық білім және ғылым
қызметкерлері кәсіподақ ұйымының баспасөз қызметі
