ҚҰҚЫҚТЫҚ САУАТТЫЛЫҚ - ЗАМАН ТАЛАБЫ
Кәсіподақтың заңмен және жарғылық құжаттармен көзделген жұмыс бағыттарының бірі – кәсіподақ мүшелерінің құқықтық сауаттылығын арттыру, саладағы түйткілдерді шешудің құқықтық әдіс тәсілдерін меңгеру болып табылады. Осы мақсатта Жамбыл облысы білім және ғылым қызметкерлерінің жергілікті кәсіподағының Сарысу аудандық комитетінің ұйымдастырумен аудандық мәдениет үйінің залында «Еңбек даулары және оларды шешудегі келісу комиссияларының рөлі» тақырыбында семинар өтті. Семинарға аудандық білім беру ұйымдарында құрылған жеке еңбек дауларын шешу жөніндегі келісу комиссияларының өкілдері қатысты.
Семинарды аудандық кәсіподақ комитетінің төрайымы Гүлмира Сұлтанбекова ашып, ҚР Еңбек кодексінің 159 бабы 1-тармағына сәйкес еңбек заңнамасын қолдану мәселелері жөніндегі жеке еңбек дауларын - келісу комиссиясы, ал реттелмеген мәселелер бойынша не келісу комиссиясының шешімдері орындалмаған кезде соттардың қарайтындығын айтып өтті. Жеке еңбек дауларын шешу жөніндегі келісу комиссиясын құру, жұмысын ұйымдастыру, келісім комиссиясының іс құжаттарын рәсімдеу мен жүргізу және еңбек дауларын сотқа дейінгі және сотта қарау тәжірбиесі туралы түсіндіру үшін семинар модераторлары аудандық құқықтық еңбек инспекторы Мәулен Абдиров, С.Сейфуллин атындағы орта мектебі директорының оқу ісі жөніндегі орынбасары Рауан Сағындықов және Айгөлек бөбекжай-бақшасының бастауыш кәсіподақ комитетінің төрағасы Алімжан Кабулов жалғастырды.
Жеке еңбек дауларын шешу жөніндегі келісу комиссиясын құру мәселесіне модератор Р.Сағындықов, комиссия қарайтын мәселелер сұрағына модератор А.Кабулов, ал комиссиясының іс құжаттарын рәсімдеу мен жүргізу тәжірибесіне аудандық құқықтық еңбек инспекторы М.Абдиров кеңінен тоқталып, түсіндірді.
Оқу семинарының соңында ҚР Жоғарғы Сотының 2017 жылғы 6 қазандағы «Соттардың еңбек дауларын шешу кезінде заңнаманы қолдануының кейбір мәселелері туралы» №9 нормативтік қаулысына шолу жасалып, қатысушылармен практикалық жұмыс жүргізілді. Практикалық жұмыс барысында топтарға түрлі ситуациялық тапсырмалар беріліп, олардың іс жүзінде қаралу тәжірибесі көрсетілді. Семинар соңында қатысушыларға арнайы сертификаттар тапсырылды.
Жамбыл облысы білім және ғылым қызметкерлерінің
жергілікті кәсіподағыныңСарысу аудандық комитеті
-
Фото
-
