ОТБАСЫЛЫҚ БАЙҚАУ ӨТТІ
Отбасы тәрбиесі – жалпы тәрбиенің ең маңызды әрі басты бөлігі. Әрбір ата-ана перзенті өмірге келген күннен бастап оған барынша мейірімділік пен қамқорлық танытып, болашағына бағыт-бағдар беріп, саналы азамат болып қалыптасуы үшін барлық жағдайды жасайды. Отбасылық құндылықтар мен дәстүрлер әрдайым біздің қоғамның және мәдениеттің негізі болды және болып қалады да. Біз де өз тарапымыздан ізгі дәстүрлер мен әдет-ғұрыпты сақтап, оларды насихаттап, көптеген отбасыларға, әсіресе жас отбасыларға қолдау білдіру керекпіз. Өйткені тбасылық құндылықтарды насихаттаудың маңызы жоғары.
Осы орайда колледжде құндылықтарға негізделген білім беру жобасы аясында бастауыш кәсіподақ ұйымының ұйымдастыруымен «Мен және менің отбасым!» атты отбасылық байқау өтті. Байқауға 7 отбасы қатысып, әрқайсысы жеке топ құрады. Әр топ жеңіс мәресіне жету үшін бірнеше кезеңнен тұратын кедергілерден өтті. Байқау нәтижесінде І орынды «Мейірім» командасы - Жамалбаевтар отбасы, ІІ орынды «Жалын» командасы - Тоқтасыновтар отбасы, ІІІ орынды «Супер жанұя» командасы - Дубановтар отбасы иеленді. Барлық қатысқан ата-аналар өз өнерлері мен балаларына деген ыстық ықыласын көрсетіп, мерейлі де үлгілі жанұя екендігін танытты.
Отбасы құндылығы ең алдымен оның әрбір мүшесі екенін ескерсек, оларды құрметтеу, қадірлеу арқылы үлкенге қамқор, кішіге ізет дегенді үйретеміз, яғни адамгершілікті қалыптастырамыз. Текті елдің тамырын танып өскен ұрпағы отбасы құндылықтарын жадынан шығармайтыны дау туғызбайды. Болашағымызға сеніммен қарау үшін бесігімізді түзеу керек екенін ұмытпайық.
А.Биназаров,
Абай атындағы Жамбыл гуманитарлық жоғары колледж директоры,Жамбыл облысы
-
Фото
-
