КӘСІПОДАҚ ҰЙЫМЫ АРДАГЕР ҰСТАЗДАРҒА ҚҰРМЕТ КӨРСЕТТІ
Мамыр айының аяғы білім саласы қызметкерлері үшін оқу жылының қорытындысы жасалып, мектеп қабырғасынан түлеп ұшқан шәкірттермен қатар ұзақ жылдар қызмет еткен мамандарды да зейнеткерлікке шығарып, еңбектерін бағалап, сый-құрметке бөлейтін уақыт. Дәл сондай құттықтаулардың бірі – Орал қалалық №37 ЖОББМ ұжымында өткізілді.
Аталмыш мектептен биыл тоғыз маман зейнеткерлікке шығып жатыр. Ардагер ұстаздардың бәрі кәсіподақ комитетінің мүшелері. Олар: орыс тілі мен әдебиет пәнінің мұғалімдері – Құрмет Хайрушева мен Сапура Жанатарова, дене - шынықтыру пәнінің мұғалімі – Сайлау Жанатаров, өзін-өзі тану пәнінің мұғалімдері – Үміт Бажикова мен Халима Мақсотова, физика пәнінің мұғалімі – Майра Мерғалиева мен директордың шаруашылық жөніндегі орынбасары – Гүлжахан Тұрғанбекова және мекеме күзетшісі – Серік Есетов пен зертханашы – Гүлсара Мажитова.
Бастауыш кәсіподақ ұйымының төрайымы – Іңкәр Василевскаяның жетекшілігімен, мектеп ұжымының, соның ішінде жас мамандардың қолдауымен ардагерлерге салтанатты құттықтау шарасы ұйымдастырылып, мерекелік көңіл - күй сыйланды.
Кәсіподақ комитетінде ұзақ жылдар бойы мүшелік еткен мамандарға «Еңбек ардагері», «Ардагер ұстаз» деген аталымдар беріліп, Батыс Қазақстан облыстық білім және ғылым қызметкерлерінің салалық кәсіподақ ұйымының төрағасы – Марат Даупаевтың атынан «Құрмет грамотасы» марапаттары мен алғыс хаттар табысталды.
№37 ЖОББМ-ның сатылап даму кезеңдеріне куә болған, білім беру мекемелері қызметкерлерінің лайықты еңбек жағдайының қолжетімділігі жолында елеулі еңбек етіп, еңбек заңдылықтары мен ұжымдық шарттың жан-жақты реформалануына үлес қосқан ардагер мамандар мектеп басшылығы мен кәсіподақ ұйымына өздерінің алғыс-тілектерін жеткізді.
Еске сала кетейік, бүгінгі таңда аталмыш мектеп ұжымында 185-ке жуық маман қызмет ететін болса, оның барлығы дерлік кәсіподақ мүшелері болып табылады.
БҚО КӘСІПОДАҚ ҰЙЫМЫ
-
Фото
-
