ЕР – ЕЛ ҚОРҒАНЫ
Ақтөбе облыстық білім және ғылым қызметкерлері кәсіподақ ұйымы
7 мамыр – Отан қорғаушылар күні мерекесіне орай Ауғанстанда интернационалдық борышын өтеген ардагерлер мен Семей ядролық сынақ полигонында әскери міндетін атқарған білім саласының қызметкерлерін марапаттады. Кәсіподақ мүшелеріне облыстық білім басқармасы мен білім кәсіподағының бірлескен алғыс хаты және «Сарығаш» емдеу-сауықтыру орталығына жолдама берілді. Бүгінгі күні аймақтағы білім саласында ауған соғысы және Семей ядролық полигонында әскери қызмет атқарған 50-ден астам адам еңбек етеді.
Онлайн режимінде өткен жиынды ашқан салалық кәсіподақ ұйымының төрайымы Раушан Серікова қатысушыларды алдағы мамыражай мерекелермен құттықтап, ізгі лебізін білдірді.
« Халқымыздың ерлігі мен даңқының жарқын көрінісін ұлықтаған даңқты мерекелер-батылдық пен ерліктің, қаһармандықтың символы, Отанға деген сүйіспеншілік пен адалдықтың өлшемі болып саналады.
Отан қорғау - қашанда қасиетті де қастерлі ұғым. Бұл күні біз - Ұлы Отан соғысы ардагерлерінің, Ауғанстанның отты жолдарымен өткен ержүрек жауынгерлердің және Семей ядролық сынақ полигонында әскери міндетін атқарған азаматтардың алдында тағзым етеміз. Қарулы күштер қатарында қызмет еткендер мен оның сапында жүргендерге құрмет көрсетеміз. Сіздер, тәуелсіздігіміз бен тұтастығымызды сақтауға өлшеусіз үлес қосып, халқымызға қорған болған ұлттық әскеріміздің айбынын өсіріп қана қоймай, егемен еліміздің болашағы, өскелең ұрпаққа сапалы білім, саналы тәрбие беріп, өнегелі істеріңізбен үлгі болып келесіздер»,-деді Р.Серікқызы.
Шараға Ақтөбе облысы білім басқармасының басшысы Жолдас Батырхан, білім саласында сапаны қамтамасыз ету департаментінің басшысы Бұлбұл Күзембаева, ауған соғысы жауынгер-интернационалистерінің Ақтөбе облыстық қоғамдық бірлестігінің төрағасы Аслан Балқасынов қатысып, бейбіт күннің батырларына құттықтауларын арнады.
Марапат иелерінің құрметіне Қобда ауданы, Қобда қазақ орта мектебі директорының тәрбие ісі жөніндегі орынбасары, жас маман
Жандос Нұрлыбай жыр шумақтарын оқып, А.Жұбанов атындағы Ақтөбе музыкалық колледжінің студенттері әннен шашу шашты.
-
Фото
-
