ҮСТЕЛ ТЕННИСІНЕН ТУРНИР ТӘУЕЛСІЗДІККЕ АРНАЛДЫ
Жақында Тәуелсіз еліміздің 30 жылдық мерекесіне орай Үржар аудандық білім бөлімі мен Үржар аудандық кәсіподақ кеңесі бекіткен шешімге сәйкес Жансүгіров орта мектеп – бақшасы КММ мен Абай атындағы орта мектепте үстел теннисінен мектеп аралық жарыс ұйымдастырылды.
Салауатты өмір салтын насихаттау мақсатында өткізілген аталған турнирге ауданға қарасты 30 мектеп эпидемиялық жағдайға байланысты санитарлық шектеу шараларын қатаң сақтай отырып, төмендегідей жас ерекшеліктері бойынша 25 – 34 жас, 35 – 45 жас, 46 – 55 жас , және 56 – 63 жас аралығында топ құрып , бақ сынасты.
М.Қасенов атындағы орта мектептің білікті дене шынықтыру пәнінің мұғалімі Ы.Алтынсарин төсбелгісінің иегері Қасымқан Көкееев бас төреші қызметін іскерлікпен адал атқарды.
Ақыл – ой мен алғырлықты, жылдамдық пен ептілікті және айлакерлікті қажет ететін үстел үсті теннис турниріне жоғарыда айтылған 30 орта мектептен елуге жуық сайыпқыран спортшы сайысқа түсті.
Жан берісіп, жан алысқан жарыс нәтижесінде 56 – 63 жас аралығында Абай атындағы орта мектеп мұғалімдері С.Бекішев пен А.Бекішев жүлделі I – II орынға ие болса, Жүзағаш орта мектебінен Н.Біләлов III орын иегері атанды. 46 – 55 жас аралығында саз мектебінен Д.Баудинов I орын, Сейфуллин орта мектебінен Д.Тұрлыбеков II орын және Қаратұма орта мектебінен Қ.Мырзаханов III орынға ие болса; 35 – 45 жас аралығында Абай орта мектебінен Ұ.Бейсембаев I орын , Найманбай орта мектебінен Е.Молдабаев және Бестерек орта мектебінен Р.Дүтбаев III орын алды. 25 – 34 жас аралығында жастыққа тән жігерлігімен, шат қимылымен дараланған Абай атындағы орта мектебінен Р.Ықыласов I орын, Жүзағаш орта мектебінен А.Әсет II орын және Абылайхан орта мектебінен М.Шоқаев жүлделі III орынға қол жеткізді.
Жүлделі орын иегерлеріне аудандық білім бөлімі және аудындық кәсіподақ кеңесінің құрмет грамоталары мен Дипломдарын және бағалы сыйлықтарын төраға Ж.Жынғылбаев пен жарыстың Бас төрешісі Қ.Көкеев салтанатты түрде табыстаса, жарысқа қатысушылар Тәуелсіздіктің 30 жылдық мерекесі аясында өткізілген жарыс ұйымдастырушыларына бір ауыздан алғыс сезімдерін жеткізді.
Үржар аудандық білім және ғылым
қызметкерлерінің кәсіподақ ұйымы,
Шығыс Қазақстан облысы
