КӘСІПОДАҚТЫҢ ҮЗДІК БАСТАУЫШ ҰЙЫМЫ
«Бастауыш кәсіподақ ұйымының жылына» орай, Жамбыл облысы Тұрар Рысқұлов ауданында «Кәсіподақтың үздік бастауыш ұйымы» аудандық байқау-сайысы өтті.
Кәсіподақ мүшелерінің еңбек және әлеуметтік-экономикалық құқықтары мен мүдделерін қорғау жөніндегі бастауыш кәсіподақ ұйымдарының қызметін белсендіру, ұйым жұмысының тиімділігін арттыру, білікті, белсенді төрағаларды анықтау мақсатында өткен сайысқа ауданның бірнеше бастауыш ұйымы қатысты. Барлық санитарлық талаптар сақталып, байқауға қатысушылардың ара қашықтықты сақтап отыруға жағдай жасалды.
Байқаудың алғашқы кезеңінде өтінім берген қатысушылардың жинақ портфолиолары зерделеніп, бағасы қойылды. Еңбек заңнамасы, ұжымдық шарт негізінде жасақталған тест сұрақтарына жауап берілді. Байқау соңы ситуациялық жағдаяттарды шешумен аяқталды. Барлық қатысушылар жоғары дайындықпен келгені көрініп-ақ тұрды. Тартысты байқау-сайыстың қорытындысында 3-ші орынды М.Әуезов атындағы тірек мектебінің бастауыш кәсіподақ ұйымы мен Ақбұлақ орта мектебінің бастауыш кәсіподақ ұйымы иеленді. 2-ші орынды Абай атындағы орта мектебінің бастауыш кәсіподақ ұйымы, 1-ші орынды Қ.Сұлтанбеков атындағы орта мектебінің бастауыш кәсіподақ ұйымы, ал Бас жүлдені №1 мектеп-лицейдің бастауыш кәсіподақ ұйымы иеленді.
Байқауға қатысушылардың барлығы дипломдар мен бағалы сыйлықтармен марапатталды. Бірлік пен ынтымақтың арқасында мерейі үстем болған №1 мектеп-лицейдің ұжымына алдағы облыстық байқауда сәттілік тілейміз.
А.Баймұратова,
Кәсіподақтың Т.Рысқұлов
аудандық комитетінің төрайымы.
Жамбыл облысы.
