ҰЖЫМ ТІРЕГІ-КӘСІПОДАҚ
Кәсіподақтың негізгі тыныс-тіршілігінің ең алдыңғы шебі еңбек ұжымдарында, бастауыш кәсіподақ ұйымдарында екендігі баршаға мәлім.
Кез келген кәсіподақтың күш-қуаты оның бастауыш ұйымдарының қандай болуына, олардың әрбір еңбекшінің құқықтары мен мүдделерін тиімді де белсенді түрде қорғалуын қамтамасыз етуіне тікелей байланысты.
Біздің «Оспанқұл Меңаяқұлы атындағы жалпы орта білім беретін мектебі» КММ-де кәсіподақ ұйымының жұмысы жылдық жоспарға сәйкес жүргізіледі. Ұжымдық келісім шарттар жасалып, ондағы көрсетілген шарттың орындалуы жиналыстар мен комитет отырыстарында қадағаланып отырылады.
Екі мәрте «Үздік ауыл мектебі» және «Үздік аула» атанған мектебіміздегі кез-келген іс-шаралар кәсіподақ ұйымының қолдауымен өтеді. «Жұмыла көтерген жүк жеңіл» демекші, мектебіміздің осындай үлкен жетістіктерге жетіп отырғаны ұжымның береке-бірлігінің арқасы. «Жетекші мектеп» ретінде жаңартылған білім мазмұны бойынша өтетін аймақтық семинарлар, Әл-Фараби атындағы Ұлттық Университетімен екі арадағы меморандум бойынша ұйымдастырылатын дәстүрлі аудандық олимпиадасы, Ауған соғысы ардагері,жерлесіміз А.Самратбековты еске алуға арналған аймақтық спорттық турнирлер,мектеп ұстаздарының көркемөнерпаздар байқауы,100 адамдық домбырашылар флешмобы, «Жыл мұғалімі» сайысы,көгалдандыру жұмыстары және т.б. атаулы іс-шараларға кәсіподақ кеңесі қолдау көрсетіп, шараның жоғары деңгейде өтуіне атсалысады. Мектебімізде талай жыл еңбек еткен ұжым мүшелерін зейнеткерлікке шығарып салуға арналған қызықты кештер кәсіподақ ұйымының ұйымдастыруымен өтеді. «Үлкенге құрмет» деген қағиданы ұстанған халықпыз ғой. Осы тұрғыда атаулы мерекелерде ардагер ұстаздарды құттықтап, сый-сыяпат жасап отырамыз. Мектеп әкімшілігімен бірлесе отырып, Жаңа жыл мерекесі аталып өтеді және ұжым мүшелерінің балаларына сыйлықтар беріледі. Аянбай еңбек етіп жүрген ұжым мүшелері кәсіподақ ұйымының атынан берілген әртүрлі сауықтыру орындарына дем алуға жіберіледі. Олар «Мойылды», «Көктем», «Сары-ағаш» тағы да басқа шипажайларда дем алып, ризашылықтарын білдіріп жатады.
«Мектепке жол» қайырымдылық акциясынан да кәсіподақ ұйымы тысқары қалған жоқ. Әлеуметтік жағынан аз қамтылған ұжым мүшелерінің балаларына бөлінген ақшадан заттай көмек көрсетіліп тұрады.
Салауатты өмір салтын сақтауды насихаттау мақсатында спорттық жарыстар өткізіледі. Футбол, волейбол, дойбы, тоғызқұмалақ және тағы да басқа спорт түрлерінің жеңімпаздарына ақшалай сыйлықтар беріліп, марапатталады.
Кәсіподақ жанынан құрылған жастар ұйымы жоспарға сәйкес жұмыс жасап, жастарымыз мектеп өміріне, ауыл өміріне де белсене араласады.
2011 жылдан бастап Аягөз ауданы бойынша Атқару комитетінің шешімімен
15 сәуірде - Кіші қызметкерлер күні аталып өтеді. Мектебіміздің тазалығын сақтап, жылумен, жарықпен қамтамасыз етіп отырған кіші қызметкерлердің еңбектері ерен.
Әлемді жайлаған пандемия кезеңінде де мектебіміздің бастауыш кәсіподақ ұйымы мектеп әкімшілігімен бірлесе отырып қашықтықтан жұмыстар жасады. Әр мерекеде онлайн құттықтаулар, челлендждер ұйымдастырды.
Биыл Қазақстан Республикасы Тәуелсіздігіне 30 жыл. Берекені мақсат тұтқан еліміз ешқашан мерекелі тірлік жасаудан жалықпаған. "Береке бастауы - бірлік, ел іші тату тірлік" қағидасын ұстанған елімізде айтулы шараны тағылымды деңгейде, тәрбиелік бағытта атап өту жоспарланған. Осы орайда біздің орта мектепте де «Бірлік - бақыт бастауы» атты тақырыпта ауқымды шаралар ұйымдастыружоспары бар.
Мектеп ұжымы мен оқушыларына тәуелсіздік жылдарында жеткен жарқын жетістіктер, тұңғыш Елбасының ерен ерлігін насихаттау - басты мақсат, мұрат болмақ. Бұл бағыттағы жұмыстар негізінен басталып кетті. Жыл соңында Тәуелсіздік мерекесі қарсаңында қортындылары жасалатын болады.
Дана бабаларымыз «Ырыс алды - ынтымақ» деп бірлікті бірінші орынға қойған. Кәсіподақ комитетінің ұжым қызметкерлерімен бірігіп ұйымдастырған іс-шаралармыздың барлығы береке-бірлігіміз бен ауызбіршілігіміздің жемісі. Алдағы уақытта да жоғары ұйымшылдықпен жарқын жетістіктерді бағындырып, жаңа белестерге көтеріле беретінімізге сенімім мол.
А.Қажықанкызы,«Оспанқұл Меңаяқұлы атындағы
жалпы орта білім беретін мектебі»КММ-нің кәсіподақ төрайымы,
Аягөз ауданы, Баршатас ауылы,Шығыс Қазақстан облысы
-
Фото
-
