Аумақтық ұйымдардың жаңалықтары

Нұрбек Абадилов № 31 мектеп-гимназиясының қазақ тілі және әдебиеті пәнінің мұғалімі, бастауыш кәсіподақ ұйымының төрағасы, «Әділет» Кәсіподағының Төралқа мүшесі. Ол Шығыс Қазақстан облысы Абай ауданының тумасы. Білім саласында 25 жыл қызмет атқарып келеді. Шәкірттеріне білім нәрін берумен қатар, қоғамдық жұмыстарға да белсене атсалысатынын атап өту қажет.

Білім беру ұйымындағы кәсіподақ мүшелерінің еңбек құқықтары мен мүдделерін қорғау, кәсіподақ мүшелеріне материалдық көмектер көрсету, ардагерлермен тығыз байланыс орнату мен кәсіподақ мүшелерін марапаттау бойынша көптеген игі істер атқаруда.

Нұрбек Қабыкенұлы мектеп ұжымында мәдени іс-шараларды тұрақты түрде ұйымдастырады. Мектеп әкімшілігімен бірлесіп мұғалімдер арасында «Жыл мұғалімі», «Үздік оқу жоспары», «Үздік педагог-2019» сияқты сайыстар өткізіп тұрады. Мектеп ұжымы оның жетекшілігімен қалалық деңгейдегі шығармашылық байқаулардан да жүлделі орындарды иемденген.

Шәкәрім Құдайбердіұлының 160 жылдығы мен Шығыс Қазақстан облысы Абай ауданының 90 жылдығын мерекелеу аясында «Абай Құнанбаев пен Шәкәрім Құдайбердіұлының шығармашылығын насихаттағаны үшін» медалімен марапатталған.

Сонымен қатар мектептегі жас педагогтардың шығармашылық қырларын ашу үшін бірқатар жұмыстар атқаруда. Бұл ұжымдағы жас педагогтар қалалық, халықаралық деңгейдегі байқаулар мен фестивальдардың жеңімпаздары атанғанын атап өткен жөн.

№ 31 мектеп-гимназиясының педагогтары Мәскеу қаласында өткен «Педагогический старт - 2020» байқауында жеңімпаз атанды және жас педагогтар арасындағы «Общайся! Создавай! Применяй!» халықаралық фестивальында алғыс хаттармен марапатталды.

2021 жылы білім саласындағы ұзақ жылғы еңбегі мен кәсіподақ ұйымының дамуына қосқан зор үлесі үшін «Білім және ғылым қызметкерлері кәсіподағына сіңірген еңбегі үшін» төс белгісімен марапатталды.