АТҚАРУ КОМИТЕТІНІҢ ОТЫРЫСЫ ӨТТІ
Кеше Жамбыл облысы білім және ғылым қызметкерлерінің Жергілікті кәсіподағының Атқару комитетінің отырысы өтті. Алқалы жиынға Кәсіподақ Филиалдары мен тікелей бағыныстағы құрылымдық бөлімше жетекшілері, құқықтық еңбек инспекциясының заңгерлері қатысты.
Жергілікті кәсіподақ төрағасы Е.Мағзымбеков ең алдымен республикалық салалық Кеңестің, Атқару комитетінің материалдарына шолу жасап, қабылданған шешімдерді жүзеге асыру міндеттерімен таныстырды. Бұдан соң алғашқы сұрақ – жергілікті кәсіподақтың құқықтық еңбек инспекциясының 2020 жылы сала қызметкерлерін құқықтық қорғау жұмысының қорытындыларына арналды. Құқықтық еңбек инспекциясының басшысы Б.Баймағамбетов баяндамасында әр инспектордың жұмыс нәтижесіне, сала қызметкерлерінің еңбек қатынастарында орын алған түйткілдерге, оларды шешу қорытындыларына тоқталып, атқарылып жатқан жұмыстар мен түйінін тарқатуды қажет ететін өзекті проблемалар туралы ауқымды ақпарат берді.
Құқықтық инспекцияның 13 заңгері былтыр 165 білім мекемесі мен ұйымдарында ҚР еңбек заңдылығының сақталуы жағдайын тексеріп, 477 заңбұзушылық анықтаған. Барлық анықталған заңбұзушылықтар бойынша оларды жою жөнінде тиісті ұсыныстар берілген. Б.Баймағамбетовтың мәліметіне сәйкес пандемияға байланысты жарияланған шектеулер нәтижесінде тексерулер саны 2019 жылға қарағанда төмендеп, тиісінше тексерулермен байланысты өзге де көрсеткіштер төмен нәтиже берген.
- 2020 жылы құқықтық инспекцияға жазбаша 689 өтініш түсті, жеке қабылдау, телефон, интернет және БАҚ арқылы 8655 ауызша кеңестер, түсіндірулер берілді. Көрсетілген құқықтық қызметтің жалпы саны - 9018. Заңгерлер тарапынан сотқа 10 материал әзірленіп, кәсіподақ мүшелерінің құқықтарын қорғау мақсатында сотқа 3 талап-арыз, әртүрлі деңгейдегі соттарда 7 тегін өкілеттік жасалды. Тиісті шара қолдану, ықпал ету, алдын алу үшін 45 материал әртүрлі мемлекеттік және құзырлы органдарға жолданды. Құқықтық қызметтің белсенді әрекеті нәтижесінде 16 кәсіподақ мүшесіне қатысты жұмыстан босатудың алдын алу мен болдырмау, жұмысқа қайта орналастыруға қол жетті, - деді Берік Әбенұлы.
Сонымен қатар, есепті мерзімде құқықтық қызмет мамандары заңнамалық тақырыпта 75 лекция оқып, сала өкілдерінің қатысуымен 102 семинар өткізген. Құқықтық қорғау қызметінің барлық нысандары бойынша өткен жылы заңсыз ұсталып немесе төленбей қалған 415.0 млн.тг мөлшеріндегі қаржы сала өкілдеріне қайтарылса, құқықтық қызмет жұмысының 2020 жылы бойындағы жалпы экономикалық тиімділігі 528.8 млн. тг. құраған.
Алқалы жиын барысында 2020 жылғы кәсіподақ комитеті мен құрылымдық бөлімшелердегі қаржының жұмсалуы мен қаржы қызметінің қорытындылары туралы есебі тыңдалып, «Тәуелсіз елдің ұлағатты ұстаздары» педагогикалық ұжымдар көркемөнерпаздары шығармашылығының VIII фестивалінің және «Ең үздік бастауыш ұйым» аймақтық байқауының Ережелері бекітілді.
П.Бақыт,
Жамбыл облысы
-
Фото
-
