ҚОҒАМ ЖӘНЕ ӘЛЕУМЕТТІК ӘДІЛЕТТІК
Жамбыл облысы білім және ғылым қызметкерлерінің жергілікті кәсіподағының Біріккен комитеті филиалының ұйымдастыруымен «Қоғам және әлеуметтік әділеттік» тақырыбында дөңгелек үстел өтті. Іс-шараға Біріккен комитет филиалына қарасты білім беру мекемелерінде қызмет жасайтын «Алтын алқа», «Күміс алқа» иелері мен мүмкіндігі шектеулі қызметкерлер-кәсіподақ мүшелері қатысты.
Жиынды ашқан Біріккен комитеті филиалының төрағасы Ж.Орынбеков тең мүмкіндік, ынтымақтастық пен адам құқығын құрметтеу әлеуметтік әділеттік орнатудың алғашқы қадамы екеніне тоқталып, әлеуметтік әділеттіліктің сипаты әлеуметтік әріптестік туралы облыстық білім басқармасы мен білім және ғылым қызметкерлерінің жергілікті кәсіптік одағы арасында жасалған Келісім мен Ұжымдық шарттарда көрініс тапқанын жеткізді. Баяндамашы аталған құжаттарда ҚР еңбек заңдылығымен белгіленген жұмыс уақыты мен тынығу уақыты, іссапар шығындары, зиянды жағдайда жұмыс жасау мен баласы үшке толмаған ата-аналарға, мүмкіндігі шектеулі баласы бар жұмыскерге қатысты өтемақылар, төлемдер мен кепілдіктер теңдік принциптерімен реттелгенін атап өтті.
Жиынға арнайы шақырылған Тараз қаласы әкімдігінің жұмыспен қамту және әлеуметтік бағдарламалар бөлімінің сектор меңгерушісі Г.Дуйсекова, «Азаматтарға арналған үкімет» МК КЕАҚ Тараз қалалық бөлімі басшысының орынбасары Ғ.Айдымбекова алтын және күміс алқа иегерлері мен мүмкіндігі шектеулі азаматтарға қатысты қолданыстағы заңнамалармен көзделген кепілдіктер, жеңілдіктер мен төлемдер тұрғысында, зейнетақымен қамтамасыз ету мәселелері бойынша ақпарат-кеңес берді.
Іс-шара барысында алтын құрсақты аналар мен мүгедек жандар мамандардан өздерін жиі мазалайтын – мүгедектігі үшін алатын жәрдемақы мөлшері, электронды портал арқылы қызмет алу, мүгедектерге арналған арба мен ортопедиялық бұйымдар мен аяқ киімдер алу, денсаулық саласы мекемелерімен байланыс, 58 жаста зейнетке шығу мен жұмысты жалғастыру барысындағы зейнетақы қорына ұсталатын жарнаның ұсталмауы, 1998 жылдың 1-ші қаңтарына дейін еңбек өтілі бар азаматтардың зейнетке шыққан жағдайда алатын зейнетақы түрі мен мөлшері туралы сұрақтарға жауап алды. Жиынды облыстық білім және ғылым қызметкерлерінің жергілікті кәсіподағының төрағасы Е.Мағзымбеков қорытындылап, кәсіподақ тарапына түскен бірқатар сұрақтарға жауап берді.
Жиын соңында барлық қатысушыларға кәсіподақ ұйымының атынан естелік сыйлықтар табысталды.
П.Бақыт,
Жамбыл облысы
-
Фото
-
