ДҮНИЕЖҮЗІЛІК ӘЛЕУМЕТТІК ӘДІЛЕТТІЛІК КҮНІ
Қызылорда облыстық Ә.Тәжібаев атындағы кітапханасының мәжіліс залында «Дүниежүзілік әлеуметтік әділеттілік» күніне арналған «КӘСІПОДАҚ - АЗАМАТТЫҚ ҚОҒАМНЫҢ МАҢЫЗДЫ БӨЛІГІ» тақырыбындағы дөңгелек үстел өтті. Шараға Қызылорда облыстық Еңбек бақылау басқармасының бөлім басшысы Б.Досымов, сонымен қатар БАҚ өкілдері қатысты.
«Дүниежүзілік әлеуметтік әділеттілік» күні әлемде 2009 жылдан бері аталып келеді. БҰҰ Бас Ассамблеясы мерекені 2007 жылдың 26 қарашасында бекітіп, мүше-мемлекеттер бұл күнді ұлттық деңгейде әлеуметтік әділеттілікті нығайтуға бағытталған іс-шараларды өткізуге арнайды. Басты мақсаты - кедейшілікті жою, еңбекпен толық қамтамасыз ету, барлық адамдар үшін әлеуметтік жайлы жағдай мен әділеттілікті іске асыру принциптерін қолдайды.
Сәйкесінше, кәсіподақ ұйымының басты бағыты да өңіріміздегі білім қызметкерлерінің құқықтық мүдделерін қорғау, олардың әлеуметтік жағдайларының тұрақтылығын қамтамасыз ету.
Кездесуді комитет төрайымы Гүлнар Есқалиева ашып, барлық қатысушыларды Тәуелсіздіктің ордалы 30 жылдығымен құттықтады. Дөңгелек үстелдің модераторлығын өзі жүргізіп, атаулы күнге орай, пандемия жағдайында атқарылған жұмыстар туралы сөз тарқатты.
Еңбек бақылау департаментінің бөлім басшысы Болат Досымов кәсіподақ тарапынан әділеттілік жолында көптеген жұмыстар жасалып жатқандығын атап өтіп, алдағы уақытта назар аудару керек мәселелерге тоқталды.
Кәсіподақ комитетінің 2020 жылға атқарылған құқықтық жұмыстар нәтижесін төрайым орынбасары Нүргүл Утегенова қатысушыларға егжей-тегжейлі таныстырды.
Атаулы күн қарсаңындағы басқосу соңында облыстағы бірқатар БАҚ өкілдеріне кәсіподақ жұмысын насихаттаудағы бірлескен жұмысы үшін комитеттің Алғыс хаты табысталды.
-
Фото
-
