КӘСІПОДАҚ КӨШБАСШЫЛАРЫМЕН КЕЗДЕСУ
Қазақстан Республикасы кәсіподақтар федерациясы төрағасының орынбасары Н.Өтешов Жамбыл облысына жұмыс сапары аясында білім және ғылым қызметкерлері кәсіподағының өкілдерімен кездесті. Кәсіподақ үйінің мәжіліс залында өткен кездесуге аудандық ұйым жетекшілері, кәсіподақ аппараты мен бастауыш ұйым төрағалары қатысты.
Жиында Н.Өтешов Жамбыл облысы кәсіподақтар бірлестігінің төрағасы лауазымына сайланған Бағлан Қарашолақовты таныстыра отырып, кәсіподақтар федерациясының алдағы уақытта атқарылатын жұмыстарының негізгі басым бағыттарына тоқталды.
- Кәсіподақтар федерациясы 2020-2025 жылдарға арналған Стратегиясын іске асыру аясында кәсіподақ мүшелерін федерация қызметіне және шешім қабылдау процесіне тартуға бағытталған «Халық бюджеті» мен «Халықтық бақылау» жобаларын әзірледі. Жобаларға қойылатын басты талаптар - әлеуметтік-қоғамдық маңызы, өзектілігі, жаңашылдық, кәсіподақты одан әрі дамыту перспективаларының болуы, - деді Н.Сүлейменұлы.
Берілген ақпаратқа сүйенсек аталған жобалар жұмысшы мамандықтарының беделін көтеру, жұмыскерлердің әлеуметтік және еңбек құқықтарын қорғау, әлеуметтік әріптестікті дамыту, қауіпсіз еңбек жағдайлары мен лайықты жалақыны қамтамасыз етуге бағытталып отыр.
Бұдан соң білім және ғылым қызметкерлерінің жергілікті кәсіподағының төрағасы Е.Мағзымбеков салалық ұйымның кәсіподақ мүшелері-сала қызметкерлерін құқықтық қорғау, ұжымшарттық жұмыс жүргізу арқылы еңбек қатынастарын реттеу бойынша атқарылып жатқан жұмыстарға тоқталып, алдағы жоспарлармен бөлісті.
Салалық ұйымның кәсіподақ мүшелерін құқықтық қорғау бойынша нәтижелі жұмыстарын жоғары бағалаған Н.Өтешов мұндай оң тәжірибені барлық өңірде енгізуді қолға алу керектігіне назар аударды.
П.Бақыт,
Жамбыл облысы
-
Фото
-
