ҰЖЫМДЫҚ ШАРТ – ҚЫЗМЕТКЕРЛЕР ИГІЛІГІНЕ
Павлодар ауданының білім беру мекемелері 2021-2023 жылдарға жасалған жаңа ұжымдық шартқа енгізілген өзгерістер мен толықтыруларды белсенді түрде талқылап жатыр.
Ұжымдық шарт жұмыс беруші мен қызметкерлер арасында жасалатын жазбаша келісім түріндегі құқықтық акт бола отырып, ұйымдағы әлеуметтік-еңбек қатынастарын реттейді.
Ұжымдық шарттың әлеуметтік-еңбек қатынастарын және қызметкерлердің экономикалық құқықтары мен заңды мүдделерін қорғауға, жұмыс берушінің (ұйымның) тиімді жұмысын қамтамасыз етуге, ұжымдық шартқа қол қойған тараптардың өзара жауапкершілігін арттыруға бағытталатыны белгілі.
Мерзімі өткен ұжымдық шарттың нәтижелерін қорытындылай келе, оның нәтижелі және тиімді болғандығын атап өтуге болады. Ұжымдық шарттың әр бөлімі мен тармағының артында денсаулықты жақсартуға, балаларды дүниеге әкелу, отбасылы болуға, тұрмыстық қиын жағдайларға байланысты түрлі төлемдер алған нақты адамдар тұр.
Биыл коронавирус індетінің таралуы кезінде осы құқықтық құжаттың арқасында кәсіподақ мүшелерінің құқықтары жан-жақты қорғалды. Білім басқармасы мен облыстық кәсіподақ ұйымы арасындағы Салалық келісімге сәйкес әр жұмыскерге жұмыс тоқтап қалған жағдайда төлемдері жүргізілді.
Ұжымдық келісім науқанының басталуы қарсаңында Павлодар облыстық кәсіподақ ұйымының құқықтық мәселелер жөніндегі бас маманы Джаркенова Гүлшат Оралқызы өткізген «Ұжымдық шарт жасасу бойынша, ұжымдық шарттар жүргізу бойынша әдістемелік ұсынымдар» атты бейне сабақ үлкен көмек болды.
Қазіргі таңдап мектепке дейінгі және орта білім беру ұйымдары, ТжКБ үшін ұжымдық шарттардың жобасы әзірленді. Жаңа ұжымдық шартқа Қазақстан Республикасының «Педагог мәртебесі туралы» Заңы, еңбек заңнамасындағы өзгерістер енгізілді.
Ұжымдық келіссөзге қатысқан барлық жұмысшылар мен жұмыс берушілер жаңа ұжымдық шарт жұмысшылардың құқықтары мен мүдделерін қорғайды, әлеуметтік шиеленісті болдырмауға, жемісті еңбек ету үшін қолайлы жағдай жасауға көмектеседі деген сенім білдірді.
С.Матаева,«Павлодар аудандық білім қызметкерлерінің
кәсіподақ ұйымы» филиалының төрайымы, Павлодар облысы
-
Фото
-
