ОЙЫЛ ПЕДАГОГТАРЫНА 3 МЛН ТЕҢГЕ ЖӘРДЕМАҚЫ ТӨЛЕНДІ
2020 жылдың соңғы күндері Ақтөбе облысының мұғалімдері үшін жағымды жаңалықтарға толы болды. Өткен аптада Ақтөбеде бірнеше жылдан бері білім беру мекемелерінің басшыларына, директордың оқу және тәрбие ісі жөніндегі орынбасарларына мұғалімдік лауазымды қоса атқарғаны үшін сауықтыруға арналған жәрдемақы төленбей келгенін хабарлап едік. Ақтөбе облысы, Темір аудандық салалық білім қызметкерлері кәсіптік одағы мен аудандық білім, дене-шынықтыру және спорт бөлімі арасындағы әлеуметтік әріптестік аясында Темір ауданындағы мектеп директорлары мен олардың орынбасарларына оқу жүктемелеріне сәйкес жалпы сомасы 10 214 000 (он миллион екі жүз он төрт мың) теңге жәрдемақы сомасы өлдіріліп берген болатын.
Темір ауданынан соң іле-шала Ойыл аудандық білім қызметкерлері кәсіподақ ұйымы да нәтижелі жұмыс үлгісін көрсетті.
Салалық кәсіподақ пен аудандық білім, дене-шынықтыру және спорт бөлімі арасындағы әлеуметтік әріптестік аясында Ойылдық педагогтарға 3 млн теңге жәрдемақы төленді.
Өңірде сала қызметкерлерінің кәсіби мүдделері мен еңбек құқықтарын қорғау жұмыстары жалғасып жатыр.
