МЕРЕКЕЛІК МАРАПАТ
Еліміздегі ең ұлық мерекеге орай ақтөбелік ұстаздар құрметке бөленді. Өңір педагогтарын облыстық білім және ғылым қызметкерлері кәсіптік одағы қолдады. «Кəсіподақ: тұрақты қолдау, тұрақты құрмет» атты дәстүрлі шара аясында онлайн форматында салтанатты марапаттау рәсімі өтті.
Білім беру жүйесіндегі жемісті еңбегі, педагогикалық шеберлігі және жаңартылған білім беру технологияларын дамытудағы шығармашылық жетістіктері үшін 51 мұғалім облыстық білім қызметкерлерінің кәсіподағы мен білім басқармасының алғыс хатына ие болып, сыйақымен марапатталды. Үздік ұстаздарды Салалық білім және ғылым қызметкерлері кәсіптік одағы Ақтөбе облыстық ұйымының төрайымы Раушан Серікова Тәуелсіздік күнімен құттықтап, жұмыстарына жеміс тіледі.
«Құрметті әріптестер, биылғы жыл кім кімге де оңайға соққан жоқ. Жер жүзін індет жайлаған кезде білім жүйесі күрделі өзгерістерге тап болды. Ұстаздарға үлкен жауапкершілік жүгі артылды. Бірақ соған қарамастан, біліктіліктерін ұштап, жетілдіріп, қиын сәтте шәкірт тәрбиелеуге үлес қосып, ерекше форматта білім берген ұстаздарымыздың еңбегін жоғары бағалаймыз. Тәуелсіз еліміздің тұғырын нығайтып, гүлденіп дамуына қосып жатқан үлестеріңіз зор!»,- деді ол.
ҚР Тәуелсіздігі күніне орай Ақтөбе облыстық кәсіподақтар бірлестігінде де мерекелік жиын өтті. Салтанатты жиында кәсіподақ ардагерлері мен бастауыш кәсіподақ мүшелері еңбектегі жетістіктері мен кәсіподақты дамытуға қосқан үлестері үшін ҚР Кәсіподақтар Федерациясының Құрмет грамотасымен және Ақтөбе облысы әкімі Оңдасын Оразалиннің және Ақтөбе облыстық аумақтық кәсіподақтар бірлестігі төрағасының алғыс хаттарымен марапатталды. Аймақ басшысының алғыс хатына ие болғандардың қатарында Ақтөбе ғылыми-тәжірибелік орталығы бастауыш кәсіподақ ұйымының төрайымы Гүлмира Нөкеева және «Ақтөбе-Дарын» ғылыми-тәжірибелік орталығы бастауыш кәсіподақ ұйымының төрайымы Гүлназ Оспанова бар.
Ақтөбе облыстық білім және ғылым қызметкерлері кәсіподақ ұйымының төрайымы Раушан Серікова облыс мектептерінде нәтижелі еңбек етіп келе жатқан 10 ұстазды алғыс хатпен марапаттап, қаржылай сертификат табыстады.
-
Фото
-
